صدر پاکستان ڈاکٹر عارف علوی اور وزیر اعظم پاکستان سمیت وزیراعلیٰ پنجاب چوہدری پرویز الہیٰ نے برطانیہ کی ملکہ الزبتھ دوئم کے انتقال پر اظہار تعزیت کیا ہے۔

صدر پاکستان ڈاکٹر عارف علوی نے ملکہ الزبتھ دوئم کے انتقال پر شاہی خاندان، حکومت اور برطانیہ کی عوام سے دلی تعزیت کا اظہار کیا ہے۔

صدر مملکت کا کہنا ہے کہ ان کے جانے سے ایک بہت بڑا خلا پیدا ہوا ہے جسے آنے والے وقتوں میں پُر کرنا مشکل ہے، وہ بہت چھوٹی عمر میں تخت نشین ہوئیں لیکن انہوں نے پختگی، کردار اور اعلیٰ ترین عزم کا مظاہرہ کیا۔

ڈاکٹر علوی کہتے ہیں کہ ملکہ الزبتھ دوئم دنیا میں طویل ترین حکمرانی کرنے والے حکمرانوں میں سے ایک تھیں، ان کی ولولہ انگیز قائدانہ صلاحیتوں نے انہیں عظیم اور مہربان حکمران کے مرتبے تک پہنچایا جسے عالمی تاریخ میں سنہری الفاظ میں یاد رکھا جائے گا۔

 صدر مملکت نے مرحومہ کی روح کیلئے دعا کی جب کہ انہوں نے مزید کہا کہ دکھ کی اس گھڑی میں میرے خیالات شاہی خاندان اور برطانیہ کی عوام کے ساتھ ہیں۔

اس موقع پر وزیر اعظم پاکستان شہباز شریف نے سماجی رابطے کی ویب سائٹ پر ٹوئٹ کرتے ہوئے ملکہ الزبتھ دوم کے انتقال پر گہرے غم کا اظہار کیا ہے۔

Deeply grieved at the passing of Her Majesty Queen Elizabeth II. Pakistan joins the UK & other Commonwealth nations in mourning her death. My heartfelt condolences to the Royal Family, people & government of the UK. @10DowningStreet @RoyalFamily

— Shehbaz Sharif (@CMShehbaz) September 8, 2022

ان کا کہنا ہے کہ ’ان کی موت کے سوگ میں پاکستان بھی برطانیہ اور دیگر دولت مشترکہ ممالک میں شامل ہے۔ برطانیہ کے شاہی خاندان، عوام اور حکومت سے میں دلی تعزیت کرتا ہوں۔

دوسری جانب وزیر اعلیٰ پنجاب چودھری پرویزالٰہی نے بھی ملکہ برطانیہ کے انتقال پر گہرے دکھ و افسوس کا اظہار کرتے ہوئے برطانیہ کے شاہی خاندان اور برطانوی عوام سے دلی ہمدردی و اظہار تعزیت کیا ہے۔

انہوں نے کہا کہ ملکہ الزبتھ دوئم نے انسانیت کی فلاح وبہبود کیلئے گراں قدر خدمات سرانجام دیں، ملکہ الزبتھ دوئم نے محروم طبقے کے لئے بے مثال کام کیے جو ہمیشہ یاد رکھے جائیں گے۔

چودھری پرویزالٰہی کا کہنا تھا کہ ملکہ الزبتھ دوئم کا پاکستان کے ساتھ خصوصی تعلق اور لگاؤ تھا، ان کے انتقال سے دنیا انسانیت سے محبت کرنے والی شفیق شخصیت سے محروم ہوگئی ہے۔

ان کا کہنا تھا کہ ملکہ الزبتھ دوئم جیسی عظیم شخصیت صدیوں بعد پیدا ہوتی ہیں، ان کی گراں قدر خدمات کو کبھی فراموش نہیں کیا جاسکتا۔

انہوں نے مزید کہا کہ پنجاب حکومت شاہی خاندان اور برطانوی عوام کے دکھ میں برابر کی شریک ہے۔