وزیر داخلہ رانا ثناءاللہ نے کہا ہے کہ روڈ ٹو مکہ پراجیکٹ پاکستانی عازمین حج و عمرہ کیلئے انتہائی سود مند ہے۔

تفصیلات کے مطابق پاکستان میں تعینات سعودی سفیر نواف بن سعیدالمالکی نے وزیر داخلہ رانا ثناءاللہ سے ان کی رہائشگاہ پر ملاقات کی جس میں پاک، سعودی عرب دو طرفہ تعلقات سمیت باہمی دلچسپی کے دیگرامور پر گفتگو ہوئی۔

ملاقات کے دوران پاکستان اور سعودی عرب کے درمیان روڈ ٹو مکہ پراجیکٹ تعاون معاہدے کے مسودے اور سعودی عرب کے قومی دن کے حوالے سے تقریبات سے متعلق مختلف پروگرامز کے حوالے سے بھی بات چیت ہوئی۔

اس موقعے پر وزیر داخلہ نے حالیہ سیلاب میں متاثرین کیلئے ہنگامی انسانی امداد پرسعودی حکومت اور عوام کا شکریہ ادا کیا اور پاکستان سے عازمین حج کیلئے روڈ ٹو مکہ پراجیکٹ 2022 کے کامیاب انعقاد پر سعودی سفیر کو مبارکباد پیش کی۔

وزیر داخلہ رانا ثناءاللہ نے کہا کہ پاکستان اور سعودی عرب کے تعلقات تاریخی، دیرینہ اور برادرانہ ہیں، روڈ ٹو مکہ پراجیکٹ معاہدے میں مزید وسعت اور بہتری لائیں گے۔

رانا ثناءاللہ نے کہا کہ پاکستان اور سعودی عرب کے درمیان سیکیورٹی تعاون مزید بڑھائیں گے، پاکستان اور سعودی عرب مل کر تمام داخلی اور علاقائی سیکیورٹی چیلنجز کا مقابلہ کرینگے۔

وزیر داخلہ نے کہا کہ پاکستان کے عوام خادمین حرمین شریفین سے خاص عقیدت اور محبت رکھتے ہیں، سعودی عرب نے پاکستان کے مشکل ترین حالات میں ہمیشہ فراخدلانہ مدد اور معاونت کی ہے، سیلاب زدگان کی بروقت امداد سے حکومت کی متاثرین کی بحالی میں مدد ملی، شکرگزار ہیں۔

ان کا کہنا تھا کہ سعودی عرب کے قومی دن کے حوالے سے تقریبات میں شرکت میرے لئے ایک اعزاز ہو گا۔

سعودی سفیر نے کہا کہ پاکستان اور سعودی عرب کے درمیان سفارتی تعلقات کے 75 سال مکمل ہونے پر بہت خوش ہیں، سعودی عرب کے قومی دن کی مناسبت سے ثقافتی تقریبات کا انعقاد کیا جا رہا ہے، پاکستان اور سعودی عوام کو مزید قریب لانے کے لئے ثفافتی تقریبات کا اہتمام کیا جا رہا ہے۔