پنجاب حکومت کی جانب سے ہیلتھ کارڈ پروگرام میں پیچیدہ لیور سرجری اور بچوں کے دل کی پیچیدہ سرجری کو شامل کرنے کا فیصلہ کیا گیا ہے۔

تفصیلات کے مطابق وزیراعلیٰ پنجاب چوہدری پرویزالٰہی سے بحریہ انٹرنیشنل ہاسپٹلز کی وائس پریزیڈنٹ ڈاکٹر شازیہ ملک کی ملاقات ہوئی ہے۔

ملاقات کے دوران بحریہ انٹرنیشنل ہاسپٹلز کی جانب سے ہر ممکن تعاون کی یقین دہانی کرائی گئی ہے اور بتایا گیا ہے کہ ہیلتھ کارڈ پر آپریشن اورپوسٹ آپریشن کیئر کی سہولت فراہم کی جائے گی۔

اس حوالے سے وزیراعلیٰ پنجاب نے کہا ہے کہ بحریہ انٹرنیشنل ہاسپٹلز کے اشتراک سے مریضوں کو جگر، گردے اور لبلبہ کی سرجری کی سہولت دی جائے گی۔

اس موقع پر چوہدری پرویزالٰہی نے ہیلتھ کارڈ کے ذریعے علاج کرانے کیلئے مختص رقم میں اضافے کی  اصولی منظوری دے دی ہے جبکہ وزیراعلیٰ کی خصوصی ہدایت پر ہیلتھ کارڈ پروگرام میں پیچیدہ لیور سرجری اور بچوں کے دل کی پیچیدہ سرجری  کو بھی شامل کرنے کا فیصلہ کیا گیا ہے۔

خیال رہے کہ بحریہ انٹرنیشنل ہاسپٹلز کے ڈاکٹر فیصل حنیف اورجنرل ریٹائرڈ افتخار، پرنسپل سیکرٹری وزیراعلیٰ محمد خان بھٹی، سابق پرنسپل سیکرٹری وزیر اعلیٰ جی ایم سکندر ، سیکرٹری سپیشلائزڈ ہیلتھ کیئر اینڈ میڈیکل ایجوکیشن عمران سکندر بلوچ اور متعلقہ حکام بھی اس موقع پر موجود تھے۔