پی ٹی آئی پارلیمانی لیڈر سندھ اسمبلی خرم شیر زمان نے کہا ہے کہ آئی ایم ایف کے غلاموں کیخلاف مزید خاموش نہیں رہ سکتے۔

پی ٹی آئی کے ڈپٹی سیکرٹری جنرل خرم شیر زمان نے اپنے جاری کردہ بیان میں کہا کہ حکومت کی ناقص پالیسیوں سے ملک کو جو خطرات ہیں شاید تاریخ میں پہلے کبھی لاحق ہوئے ہوں۔

‘بدترین مہنگائی نے حکومت کو عوام میں جانے کے قابل نہیں چھوڑا’

انہوں نے کہا کہ بدترین مہنگائی نے حکومت کو عوام میں جانے کے قابل نہیں چھوڑا ہے، اس مہنگائی کیخلاف آج کراچی میں احتجاج کیا جائے گا، احتجاج کراچی کے دل صدر ریگل چوک پر دوپہر 3:30 بجے کیا جائے گا۔

خرم شیر زمان نے مزید کہا کہ پیٹرول، ڈالر، بجلی، گیس کی قیمتوں نے لوگوں کی چیخیں نکال دی ہیں، اس حکومت کا ویژن مہنگائی کم کرنا نہیں اپنے کیسز ختم کرنا تھا، آئی ایم ایف کے غلاموں کیخلاف مزید خاموش نہیں رہ سکتے۔

تحریک انصاف کا لانگ مارچ، وزارت داخلہ نے تیاریاں شروع کردیں

دوسری جانب پاکستان تحریک انصاف کے ممکنہ لانگ  مارچ کی کالکے ڈر سے وزارت داخلہ نے تیاریاں شروع کردی ہیں۔

چیئرمین پی ٹی آئی عمران خان کو اسلام آباد آنے سے روکنے کیلئے وزیر داخلہ متحرک ہوگئے ہیں ۔

اس سلسلے میں رانا ثناء اللہ نے رینجر اور ایف سی اسلام آباد میں تعینات کرنے کی سمری کابینہ کو بھیجوا دی ہے تاہم منظوری کے بعد اہلکار اسلام آباد میں تعینات کر دیئے جائیں گے۔

وزیر داخلہ کی جانب سے اسلام آباد کی سیکیورٹی کے لئے  5ہزار ایف سی اہلکار، 5 ہزار پنجاب رینجرز اور سندھ رینجرز کے 2 ہزار جوانوں کی سمری ارسال کی گئی ہے۔

خیال رہے کہ رواں ہفتے بھی اسلام آباد کے داخلی اور خارجی راستوں کو کنٹینر لگا کر اور خٓردار تاریں لگاکر بند کیا گیا تھا۔

اسکے علاوہ  سیکیورٹی کے بھی سخت انتظامات کئے گئے تھے جو کہ کسان اتحاد کے مارچ کی صورت میں کیے گئے تھے۔