عبدالقادر پٹیل نےکہا ہے کہ سیلاب سے متاثرہ اضلاع میں تقریبا 1200 ہیلتھ کیمپ لگائے جائیں گے۔

تفصیلات کے مطابق اپنے ایک بیان میں وفاقی وزیر برائے قومی صحت عبدالقادر پٹیل نے کہا کہ سیلاب متاثرین کو طبی سہولیات کی فراہمی کیلئے عملی اقدامات کیے جارہے ہیں۔

عبدالقادر پٹیل نے کہا کہ سیلاب سے متاثرہ اضلاع میں تقریبا 1200 ہیلتھ کیمپ لگائے جائیں گے، یہ کیمپس نیشنل ایمرجنسی آپریشن سیل، صوبائی ای او سیز اور آغاخان یونیورسٹی کے اشتراک سے لگائے جائیں گے۔

انہوں نے یہ بھی کہا کہ ہیلتھ کیمپس میں ادویات، بچوں کی ویکسینیشن کی فراہمی کو یقینی بنایا جائیگا جبکہ جلد کے امراض، آ نکھوں کے انفیکشن، اینٹی ڈائریا کی ادویات بھی فراہم کی جائیں گی۔

وفاقی وزیر صحت کا کہنا تھا کہ ڈیرہ اسماعیل خان پشاور، ٹانک، کے ہر ضلع میں بھی اسی طرح ہیلتھ کیمپس لگائے جائیں گے جبکہ بلوچستان کے6 اضلاع میں مجموعی طور پر تین سو کیمپ لگائے جایں گے۔

ان کا یہ بھی کہنا تھا کہ بلوچستان کے اضلاع میں لسبیلا جعفر آباد،نصیر آباد، صحبت پور، جھل مگسی، بولان، موسی خیل اور ہرنائی شامل ہیں جبکہ کراچی میں مجموعی طور پر 95 ہیلتھ کیمپ لگائے جائیں گے۔

عبدالقادر پٹیل نے کہا کہ خیبر پختونخوا کے8 اضلاع کل 4سو ہیلتھ کیمپس لگائے جائیں گے جن میں ڈیرہ اسماعیل خان پشاور ٹانک نوشہرہ، چارسدہ، سوات، شانگلہ، دیر لوئر شامل ہیں جبکہ پنجاب کے2 اضلاع ڈی جی خان راجن پور ایک سوطبی کیمپس قائم کئے جائیں گے۔

وفاقی وزیر صحت عبدالقادر پٹیل نے مزید کہا کہ اندرون سندھ کے 6 اضلاع میں 3 سو ہیلتھ کیمپس لگائے جائیں گے ، سندھ کے اضلاع میں قمبر شہداد کوٹ ، لاڑکانہ ، سکھر ، خیرپور، دادو، نوشہرو فیروز، سانگھڑ، بدین، شکارپور اور کشمور شامل ہیں۔