چودھری پرویز الٰہی نے کہا ہے کہ دریائے چناب پر دو بڑے ڈیمز بنانے کا منصوبہ بنایا ہے۔

تفصیلات کے مطابق وزیراعلیٰ پنجاب چودھری پرویز الٰہی اورسابق وفاقی وزیرمونس الٰہی سے امریکہ کے سفیر ڈونلڈ بلوم کی ملاقات ہوئی ہے۔

ملاقات میں باہمی دلچسپی کے امور، دو طرفہ تعلقات کے فروغ اور مختلف شعبوں میں تعاون بڑھانے پر تبادلہ خیال کیا گیا جبکہ زراعت، متبادل توانائی، بہبود آبادی اورواٹرمینجمنٹ کے شعبوں میں شراکت داری کو مزید فروغ دینے پر بھی اتفاق کیا گیا۔

ملاقات میں وزیراعلیٰ پنجاب چودھری پرویز الٰہی نے تعلیمی اداروں سے منشیات کے خاتمے کیلئے قانون سازی کے بارے میں بریف کیا، کورونا کی وباء کے دوران پاکستان کی بھرپور مدد پر امریکی سفیر کا شکریہ ادا کیا اور پنجاب کے عوام کی فلاح وبہبود کے لئے اقدامات سے آگاہ کیا۔

سفیر ڈونلڈ بلوم نے کہا کہ امریکہ پاکستان کے ساتھ اپنے تعلقات کو بہت اہمیت دیتا ہے،  پنجاب حکومت کے ساتھ مختلف شعبوں میں تعاون کو مزید امریکی فروغ دیں گے۔

اس موقع پر پرویز الٰہی نے کہا کہ ہم امریکہ کے ساتھ تعلقات کو خصوصی اہمیت دیتے ہیں، ہماری حکومت تعلیم،صحت، بہبود آبادی، زراعت، متبادل توانائی اورواٹر مینجمنٹ کے شعبوں میں اصلاحات لارہی ہے اور اس ضمن میں امریکہ کی تکنیکی معاونت کا خیر مقدم کریں گے۔

انہوں نے کہا کہ میرے سابقہ دور کے ایجوکیشن ریفارمز پروگرام کو عالمی سطح پر سراہاگیا، اب ہم نے آتے ہی ڈگری تک تعلیم اورکتابیں فری کردی ہیں۔

ان کا کہنا تھا کہ تعلیمی اداروں کو منشیات سے پاک کرنے کیلئے قانون سازی کا فیصلہ کر لیا گیا ہے، امریکی معاونت منشیات سے پاک پنجاب کے مشن میں ممدومعاون ثابت ہوگی۔

وزیراعلیٰ پنجاب نے کہا کہ انسداد منشیات کیلئے خصوصی فورس بنے گی، منشیات کی خریدو فروخت کی اطلاع دینے والے کو انعام بھی دیا جائے گا، منشیات کی خریدو فروخت میں ملوث ملزمان کے ٹرائل کے لئے خصوصی کورٹس بنیں گی اورروزانہ کی بنیاد پر ٹرائل ہوگا، انسداد منشیات کے حوالے سے پنجاب حکومت امریکہ کے تعاون کا خیرمقدم کرتی ہے۔

انہوں نے کہا کہ واٹر مینجمنٹ کا پروگرام 2002 میں شروع کیا لیکن بعد میں آنے والی حکومت نے اس پر کوئی کام نہیں کیا، اب ہم نے کوہ سلیمان کے پانی کو چینلائزڈ کرنے پر دوبارہ کام شروع کردیا ہے، کوہ سلیمان میں چھوٹے ڈیمز بھی بنائیں گے جبکہ دریائے چناب پر دو بڑے ڈیمز بنانے کا منصوبہ  بھی بنایا ہے۔

ان کا یہ بھی کہنا تھا کہ زرعی شعبہ کی پیداوار بڑھانے کیلئے ریسرچ اینڈ ڈویلپمنٹ میں امریکی تعاون کے مثبت نتائج برآمد ہونگے جبکہ کپاس کے نئے بیج کے لئے امریکی تعاون سے پیداوار میں بھی خاطر خواہ اضافہ ہوگا۔

وزیراعلیٰ پنجاب چودھری پرویز الٰہی نے مزید کہا توقع ہے کہ پنجاب حکومت اور امریکہ کے درمیان مختلف شعبوں میں شراکت داری کو فروغ ملے گا جبکہ ہماری حکومت لوگوں کی فلاح وبہبود کو محور بنا کرترقیاتی ایجنڈے پر عمل پیرا ہے۔

 اس موقع پر رکن قومی اسمبلی حسین الٰہی، امریکہ کے قونصل جنرل ولیم کے میکانیولپولیٹیکل و اکنامک چیف کیتھلین گبیلیسکو، سابق چیئرمین پلاننگ اینڈ ڈویلپمنٹ بورڈ سلمان غنی، چیف سیکرٹری عبداللہ سنبل، چیئرمین پنجاب سرمایہ کاری بورڈ فضیل آصف اورمتعلقہ حکام بھی اس موقع پر موجود تھے۔