چیئرمین تحریک انصاف کو جے آئی ٹی نے آج شام  5 بجے تھانہ مارگلہ طلب کر لیا ہے۔

تفصیلات کے مطابق عدالت کی جانب سے عمران خان کو شامل تفتیش کرنے کے حکم پر عمران خان کو آج جے آئی ٹی میں پیش ہونے کا نوٹس بھیج دیا گیا ہے۔

نوٹس کے مطابق عمران خان کو آج شام 5 بجے جے آئی ٹی نے طلب کیا ہے۔

خیال رہے کہ گزشتہ روز عمران خان نے دہشت گردی کے مقدمے میں جے آئی ٹی کو دوسری مرتبہ جواب جمع کروادیا ہے۔

عمران خان کی جانب سے جے آئی ٹی کو بیان ان کے وکیل انتظار حسین پنجوتھہ نے تھانہ مارگلہ میں جمع کروایا ہے جب کہ بیان جے آئی ٹی کے سربراہ رخسار مہدی کو جمع کروایا گیا ہے۔

عمران خان نے جواب میں لکھا کہ میں نے اپنی سیاسی زندگی میں کبھی بھی قانون کو ہاتھ میں نہیں لیا، میں وزیر اعظم پاکستان رہ چکا ہوں، کیسے کسی کو دہشت گردی پر اکسا سکتا ہوں۔

عمران خان کا جواب میں کہنا تھا کہ امپورٹڈ حکومت نے ڈاکٹر شہبازگل کو گرفتار کیا اور ان پر تشدد کیا گیا جو ہائی کورٹ میں ثابت ہوا جب کہ شہباز گل پر تشدد اور کارکنوں کے خلاف مقدمات پر جلسہ کیا۔

عمران خان کا کہنا تھا کہ میں نے تقریر میں تشدد کے ذمہ داران کے خلاف قانونی کاروائی کا کہا اور قانونی کاروائی کرنا ہر کسی کا حق ہے۔ میری تقریر کا مقصد کسی کو ہراساں کرنا یا دہشت پھیلانا ہرگز نہیں تھا۔

عمران خان نے اپنے جواب میں مزید لکھا کہ میرے خلاف سیاسی مخالفت کی بنیاد پر دہشت گردی کا مقدمہ بنا دیا گیا لہذا بے بنیاد مقدمے کو خارج کیا جائے۔