سینیٹ میں اپوزیشن لیڈر شہزاد وسیم نے کہا ہے کہ آج این آراو ٹو پر تیزی سے عمل جاری ہے۔

تفصیلات کے مطابق چیئرمین سینیٹ صادق سنجرانی کی زیر صدارت اجلاس کے دوران اپوزیشن لیڈر سینیٹ سینیٹر شہزاد وسیم نے اپنے خیالات کا اظہار کیا ہے۔

انہوں نے کہا کہ آج لندن فلیٹس میں رہنے والے رہتے بھی وہیں ہیں اور تضاد کی باتیں بھی کرتے ہیں، ایک کہتا رہا کہ ہمارے نہیں دوسرا کہتا رہا الحمد للہ ہمارے ہیں۔

انہوں نے مزید کہا کہ یہاں آڈیو پر سیکیورٹی بریچ ہوئی ہے اور چوری کو کھلی چھوٹ دے دی گئی ہے ۔

شہزاد وسیم نے کہا کہ آڈیو لیکس سے ثابت ہوگیا ان کا ذاتی مفاد اولین ہے، یہ آڈیو لیک میں بھارت سے پلانٹ منگوارہے ہیں اور یہ پلانٹ نجی ہاؤسنگ سکیم میں لگانے کے لئے وزیر اعظم ہاوس استعمال ہورہا ہے۔

ان کا کہنا تھا کہ آج کسان اسلام آباد کی سڑکوں پر بیٹھے ہیں اور ان کی کوئی سننے والا نہیں ہے۔

انہوں نے بتایا کہ سیلابی صورتحال کے بعد جو پانی سے بچ گیا وہ سانپ سے مر گیا جو سانپ سے بچ گیا وہ بھوک سے مرگیا ہے۔

انہوں نے کہا کہ قوم بھوکی مررہی ہے یہ چوری چھپا کر ایک دوسرے کو مٹھائیاں کھلا رہے ہیں، قوم نے یہ سب دیکھ لیا ہے اب وہ خود اپنا فیصلہ کرنے والی ہے، الیکشن کروائیں یہی مسائل کا حل ہے۔

خیال رہے کہ اس سے قبل سینیٹر فیصل جاوید خان اور سینیٹر محسن عزیزکو نہ بولنے دینے پر اپوزیشن نے سینیٹ سے واک آوٹ کردیا تھا جس پر چیئرمین سینیٹ اپوزیشن کو منانے کی ہدایت کی تھی تاہم اپوزیشن کے احتجاج کے بعد اپوزیشن کو مائیک مل گیا تھا۔

بعدازاں سینیٹ اجلاس پیر کی سہہ پہر چار بجے تک ملتوی کردیا گیا ہے۔