ملک بھر میں ڈینگی کے مریضوں کی تعداد میں تیزی سے اضافہ ہورہا ہے۔

تفصیلات کے مطابق ملک بھر میں ڈینگی کی صورتحال دن بہ دن خراب ہوتی جارہی ہے جس کے پیش نظر یومیہ ہزاروں کیسز رپورٹ ہورہے ہیں۔

بلوچستان کے بھی دواضلاع ڈینگی وائرس کی لپیٹ میں آچکے ہیں،  گوادر اور ضلع کیچ میں ایک ہفتے میں 54 کیسز رپورٹ ہوئے ہیں۔

ورلڈ ہیلتھ آرگنائزیشن کا کہنا ہے کہ ضلع کیچ میں 41 جبکہ گوادر میں 13 کیسز رپورٹ ہوئے  جبکہ 54 کیسز گوادر اور تربت میں رپورٹ ہوئے ہیں۔

 ڈینگی وائرس میں مبتلا مریضوں کو ان ہی اضلاع میں طبی امداد دی جارہی ہے جبکہ متاثرہ مریضوں کی حالت اب تسلی بخش بتائی جاتی ہے۔

محکمہ صحت بلوچستان نے بتایا کہ محکمہ صحت کی ٹیمیں متاثرہ علاقوں میں پہنچ گئی ہیں اور ڈینگی وائرس کو پھیلنے سے کسی حد تک روکا گیا ہے۔

محکمہ صحت بلوچستان کا مزید کہنا ہے کہ متاثرہ علاقوں میں کیسز گزشتہ ایک ہفتے میں رپورٹ ہوئے ہیں۔

 دوسری جانب خیبر پختونخوا میں بھی ڈینگی کے وار جاری ہیں، گزشتہ چوبیس گھنٹوں میں ڈینگی کے مزید 284 کیسز سامنے آئے ہیں۔

محکمہ صحت کا کہنا ہے کہ گزشتہ 24 گھنٹوں میں  پشاور سے 126,  مردان 66اور نوشہرہ اور ہری پور سے 22کیسز رپورٹ ہوئے۔

محکمہ صحت نے بتایا کہ صوبہ بھر میں ایکٹیو کیسز کی تعداد 1ہزار 729ہوگئی ہے جبکہ مجموعی کیسز کی تعداد 5ہزار  264ہوگئی ہے۔

محکمہ صحت نے مزید بتایا کہ ڈینگی مچھرسے اب تک 6 افراد جاں بحق ہوئے ہیں۔

ڈینگی روکنے کے لیے کمشنر کراچی کا نیا حکم نامہ جاری

 کراچی میں ڈینگی روکنے کے لیے کمشنر کراچی کی جانب سے نیا حکم نامہ جاری کردیا گیا ہے۔

کراچی میں تعلیمی اداروں میں ایک ماہ تک پی ٹی اور اسمبلی پر پابندی کا فیصلہ عائد کیا گیا ہے۔

کمشنر کراچی کا کہنا ہے کہ  اسٹوڈنٹس کو مکمل آستین اسکول ڈریسز پہننے کی ہدایت کی جائے اور تعلیمی اداروں میں صفائی کا خیال رکھا جائے۔

کمشنر کراچی نے کہا کہ ڈینگی پھیلاؤ روکنے کے لیے پہلے سے کھڑے پانی کی نکاسی اور اسپرے کیا جائے، ڈینگی مچھر ہونے پر اسکول انتظامیہ فوری متعلقہ ضلعی انتظامیہ کو آگاہ کرنے کی پابند ہوگی۔