آل بلوچستان ٹرانسپورٹ ایسوسی ایشن نے آج سندھ بلوچستان قومی شاہراہ کو مکمل بند کرنے کا اعلان کیا ہے۔

اس حوالے سے ٹرانسپورٹرز کا کہنا ہے کہ وزیراعظم کے بلوچستان دورے صرف دیکھاوے تک محدود ہیں،  سندھ جانے والی شاہراہ آج بند رہے گی۔

عوامی حلقے کا کہنا ہے کہ وزیراعظم اگر 50 لاکھ انعام دینے کی بجائے 50 سیکنڈ ڈانٹتے تو سٹرک کی مرمت ہوجاتی۔

ٹرانسپورٹرز نے بتایا کہ 20 دن سے زیادہ کا عرصہ گزر جانے کے بعد بھی بولان شاہراہ کو بحال نہیں ہوسکا، وزیراعظم ودیگر حکام صرف فوٹو سیشن کی حد تک سٹرک کی تعمیر کا کام کررہے ہیں۔

ٹرانسپورٹرز کا مزید کہنا ہے کہ بولان شاہراہ کی بحالی کیلئے اب تک زرا برابر بھی کام نہیں ہوسکا، کچھی انتظامیہ اور این ایچ اے عوام کو شدید گرمی میں ذلیل وخوار کررہے ہیں، وزیراعظم کا دورہ بس فوٹو سیشن تک تھا۔

بولان میں قومی شاہراہ اور پنجرہ پل بحال نہ ہوسکا

بولان میں سیلاب سے متاثرہ قومی شاہراہ اور پنجرہ پل بحال نہ ہونے سے سندھ اور بلوچستان کا زمینی راستہ کئی روز سے معطل ہے۔

سیلاب متاثرین سخت گرم موسم میں اپنے پیاروں کی میتیں اور بزرگوں کو بولان کے دشوار گزار راستوں اور بولان ندی سے گزارنے پر مجبور ہیں۔

شاہراہ کی بندش سے مال بردار گاڑیاں 8 روز سے کھڑی ہیں جس کے باعث گاڑیوں میں موجود سبزیاں اور کھانے پینے کی دیگر اشیا خراب ہونے لگی ہیں, قومی شاہراہ پر پناہ لیے متاثرین نے حکومت سے مدد کی اپیل کی ہے۔