ملک بھر میں آج موسم خشک رہنے کی پیش گوئی کی گئی ہے۔

محکمہ موسمیات کا کہنا ہے کہ آج ملک کے بیشترعلاقوں میں موسم خشک جبکہ وسطی و جنوبی علاقوں میں گرم رہے گا۔

 صوبہ پنجاب

صوبہ پنجاب کے بیشتر اضلاع میں آج موسم خشک اور گرم رہے گا جبکہ مری ، گلیات، خطہ پوٹھوہار، لاہور، گوجرانوالہ، سیالکوٹ، اوکاڑہ اور قصور میں  تیز ہواؤں اور گرج چمک کے ساتھ بارش کا امکان ہے۔

 صوبہ خیبرپختونخوا

صوبہ خیبرپختونخوا کے بیشتر اضلاع میں آج موسم خشک رہے گا البتہ چترال، دیر،سوات،کوہستان،ایبٹ آباد، مانسہرہ اور ہری پور میں مطلع جزوی ابر آلود رہنے کے علاوہ  تیز ہواؤں اور گرج چمک کے ساتھ بارش  کا امکان ہے۔

صوبہ سندھ

صوبہ سندھ کے بیشتر اضلاع میں بھی آج  موسم گرم اورخشک رہے گا البتہ کراچی اور حیدرآباد میں تیز ہوائیں بھی چلیں گی۔

صوبہ بلوچستان  

صوبہ بلوچستان کے بیشتر اضلاع میں آج موسم گرم اورخشک رہے گا۔

گرمی سے خود کو محفوظ بنائیں

موسم گرما میں قدرت نے ہمارے جسم کو قدرتی طور پر ٹھنڈا رکھنے کے لیے ہمارے جسم میں پسینے کا نظام بنایا ہے اور زیادہ گرمی میں زیادہ پسینہ آنے سے جسم میں پانی کی کمی پیدا ہوتی ہے خاص طور پر اْن لوگوں میں جو جسمانی مشقت کے کام کرتے ہیں اور ورزش وغیرہ کرتے ہیں یہ کمی جلدی پیدا ہو سکتی ہے۔

اس لیے ضروری ہے کہ جسم میں پانی کی کمی کو پورا کیا جائے، جب جسم میں پانی کی کمی پیدا ہوتی ہے تو بار بار پیاس لگتی ہے، معمول سے بہت کم پیشاب آتا ہے اور پیشاب کی رنگت گہری ہو جاتی ہے، جسم بہت جلد تھکاؤٹ کا شکار ہونا شروع ہو جاتا ہے، سر میں درد اور چکر آ سکتے ہیں اور ایسی صورت میں زیادہ سے زیادہ پانی پینا بہت ضروری ہو جاتا ہے۔

خاص طور پر نمک کی کمی کو پورا کرنے کے لیے لیموں کی سکنجبین کا استعمال زیادہ کریں اور اس میں نمک ڈال کر پینا شروع کر دیں، نارنجی کا جوس بھی جسم کو ڈی ہائیڈریٹ ہونے سے بچاتا ہے۔

اس کے ساتھ چائے اور کافی کا استعمال کم کریں اور ہلکے رنگ کے کپڑے پہنیں کیونکہ گہرا رنگ سورج کی دھوپ کو اپنے اندر جلدی جذب کرتا ہے اور ایسا کپڑا جلدی گرم ہو جاتا ہے اور دھوپ میں نکلنے سے پہلے اپنے سر کو سفید یا ہلکے رنگ کے کپڑے سے ضرور ڈھانپ لیں۔