عمران خان کے خلاف توشہ خانہ نا اہلی ریفرنس میں سابق وزیراعظم نے الیکشن کمیشن میں جواب جمع کرادیا ہے۔

تفصیلات کے مطابق چیف الیکشن کمشنر کی زیر صدارت پانچ رکنی بینچ نے عمران خان کے خلاف توشہ خانہ نا اہلی ریفرنس کی الیکشن کمیشن میں سماعت آج کی۔

سماعت کے لئے عمران خان کی جانب سے بیرسٹر علی ظفر اور بیرسٹر علی گوہر الیکشن کمیشن میں پیش ہوئے جبکہ درخواست گزاروں کی جانب سے محسن شاہنواز رانجھا، فاروق ایچ نائیک اور خالد اسحاق الیکشن کمیشن پیش ہوئے۔

اس دوران عمران خان کی جانب سے الیکشن کمیشن میں جواب جمع کرایا گیا جس پر ریمارکس پیش کرتے ہوئے چیف الیکشن کمشنر نے کہا کہ آپ کو سماعت سے قبل جواب دینے کی ہدایت کی تھی، جس کا جواب دیتے ہوئے بیرسٹر گوہر نے معذرت کی اور کہا کہ اسپیکر قومی اسمبلی کے ریفرنس کی بنیاد پر الیکشن کمیشن یہ معاملہ دیکھ رہا ہے جو کہ أرٹیکل 63(2) کی بنیاد پر ریفرنس دائر کیا گیا ہے۔

انہوں نے کہا کہ عمران خان کو 62(1)ایف کے تحت نا اہل کرنے کی درخواست کی گئی ہے اور الیکشن کمیشن 63(1) اور 62(ون) ایف کے تحت کارروائی نہیں کرسکتا  ہے تاہم کوئی عدالت ہی ارٹیکل 62(1) ایف کے تحت کارروائی کر سکتی ہے۔

اس موقع پر چیف الیکشن کمشنر نے کہا کہ اگر آپ الیکشن کمیشن کا دائرہ اختیار چیلنج کر رہے ہیں تو الگ درخواست دائر کریں۔

بعدازاں چیف الیکشن کمشنر نے دوسرے فریق کو جواب کی کاپی دینے کا کہا جس کے بعد عمران خان کے جواب کی کاپی دوسرے فریق کی دیدی گئی۔

تاہم بیرسٹر خالد اسحاق  نے کہا کہ جواب کا جائزہ لینے کے بعد دلائل کا آغاز ہونے چاہییں جس کے بعد چیف الیکشن کمشنر نے 19 ستمبر کے بعد کوئی التواء کی درخواست منظور نہیں کریں گے۔

خیال رہے کہ الیکشن کمیشن نے کیس کی سماعت 19 ستمبر تک ملتوی کردی ہے۔

توشہ خانہ ریفرنس میں عمران خان کا جواب:

سابق وزیراعظم عمران خان نے جواب الیکشن کمیشن میں جمع کروا دیا ہے جو کہ 60 صفحات پر مشتمل ہے۔

جواب کے مطابق عمران حکومت کے ساڑھے تین سال کے دوران 329 تحائف موصول ہوئے جبکہ توشہ خانہ کے 58 تحائف سابق وزیراعظم عمران خان اور انکی اہلیہ نے وصول کیے۔

اسکے علاوہ تیس ہزار سے زائد مالیت کے کل 14 تحائف سابق وزیراعظم اور اہلیہ کو ملے تاہم جواب میں تمام تحائف ٹیکس ریٹرن اور اثاثوں کی تفصیلات میں موجود ہیں۔

جواب میں بتایا گیا ہے کہ توشہ خانہ تحائف کے چار یونٹ بیچے گئے جبکہ توشہ خانہ تحائف کے بدلے تین کروڑ سے زائد کی رقم ادا کی گئی۔