سینئر صوبائی وزیر میاں اسلم اقبال نے کہا ہے کہ نئی نسل کو صاف ماحول کی فراہمی کے لیے شجر کاری مہم کو کامیاب بنانا ہے۔

تفصیلات کے مطابق سینئر صوبائی وزیر میاں اسلم اقبال کی زیر صدارت 90 شاہراہ قائد اعظم پر اجلاس ہوا جس میں شجر کاری مہم کو بھر پور طریقے سے آگے بڑھانے کا فیصلہ کیا گیا۔

اجلاس میں کینال کے دونوں جانب دستیاب جگہوں پر سبزیاں اگانے کا پائلٹ پراجیکٹ شروع کرنے کا فیصلہ بھی ہوا، شجر کاری مہم میں پرائیویٹ و سرکاری رہائشی کالونیوں، تعلیمی اداروں،ایون ہائے صنعت و تجارت اور صنعتوں کو شامل کیا جائے گا۔

میاں اسلم کا اس موقعے پر کہنا تھا کہ نئی نسل کو صاف ستھرے ماحول کی فراہمی کے لئے شجر کاری مہم کو کامیاب بنانا ضروری ہے، شہروں کے داخلی اور خارجی راستوں سے تجاوزات ہٹا کر یہاں خوبصورت پودے لگائے جائیں گے، شہر میں ایل ای ڈی لگا کر روزانہ کی بنیاد پر لگائے گئے پودوں کا اندراج کیا جائے گا، شہروں کی بڑی شاہراہوں پر زیادہ سے زیادہ پودے لگائے جائیں گے۔

ان کا کہنا تھا کہ لاہور سے اسلام آباد جی ٹی روڈ کو دو ماہ کے اندر پودے لگا کر سرسبز بنایا جائے گا، شجر کاری مہم کے دوران پانچ فٹ تک کے پودے لگائے جائیں گے، تمام اضلاع شجر کاری مہم کے اہداف مقرر کر کے بھجوائیں، شہریوں میں پودوں کی مفت تقسیم کے لئے مہم شروع کی جائے گی۔

میاں اسلم اقبال نے کہا کہ عوام کو شجر کاری کی افادیت اور اہمیت سے آگاہ کرنے کے لئے بھر پور مہم چلائی جائے، جیو ٹیگنگ کے ساتھ شجر کاری مہم آگے بڑھائی جائے گا۔

ایم پی اے جہانزیب خان کھچی، ایڈیشنل سیکرٹری ٹیکنیکل ہاؤسنگ عمر فاروق، ڈی جی پی ایچ اے، ڈی جی ایل ڈی اے اور متعلقہ افسران نے اجلاس میں شرکت کی۔

کمشنرز اور تمام پی ایچ ایز کے حکام  ویڈیو لنک کے ذریعے اجلاس میں شریک ہوئے۔