اسلام آباد ہائی کورٹ میں 72 رکنی وفاقی کابینہ کی تشکیل کے خلاف شیخ رشید کی درخواست پر سماعت آج ہوئی ہے جس دوران سیاسی نوعیت کی پٹیشن عدالت لانے پر ہائی کورٹ کی جانب سے شدید برہمی کا اظہار کیا گیا ہے۔

سماعت کے دوران چیف جسٹس اطہر من اللہ نے تنبیہ کرتے ہوئے ریمارکس جاری کئے کہ آئندہ ایسی پٹیشن لائی گئی تو مثالی جرمانہ عائد کیا جائیگا۔

سماعت کے دوران شیخ رشید اپنے وکیل کے ہمراہ عدالت کے سامنے پیش ہوئے جس پر چیف جسٹس نے کہا کہ پارلیمنٹ کی مزید بے توقیری نا کریں یہی مائنڈ سیٹ ہے جس نے پارلیمنٹ کو نقصان پہنچایا ہے۔

شیخ رشید کے وکیل نے کہا کہ اس حوالے سے عدالت کے علاوہ ہمارے پاس اور کوئی فورم نہیں ہے تاہم چیف جسٹس اطہر من اللہ نے ریمارکس دیتے ہوئے کہا کہ اس پارلیمنٹ کی بے توقیری بہت ہو چکی ایسی پٹیشن عدالت نہیں آنی چاہیے۔

چیف جسٹس نے کہا کہ پارلیمنٹ میں منتخب نمائندے ہیں وہ فورم ہے عدالت مداخلت نہیں کرے گی۔

عدالت نے سوال کیا کہ پٹشنر جب حکومت میں تھے تو کیا آپ نے وہ معاونین خصوصی اور مشیروں کی لسٹ لگائی ہے ؟

چیف جسٹس کا کہنا تھا کہ شیخ رشید وزیر داخلہ تھے کیا انہوں  نے اڈیالہ جیل کا دورہ کیا ان کو اندازہ نہیں وہاں ہو کیا رہا، عدالت نے کہا کہ شیخ صاحب آپ کا احترام ہے آپ پارلیمنٹ کی بے توقیری نا کریں۔

چیف جسٹس کا کہنا تھا کہ یہ کورٹ پارلیمنٹ کا بھی احترام کرتی ہے غیر ضروری ایگزیکٹو کے اختیارات میں بھی مداخلت نہیں کرتی ہے اگر آپ کا کوئی انفرادی بنیادی حقوق متاثر ہورہا ہے تو ضرور عدالت آئیں لیکن اس طرح نہیں، یہ آپ کی بے بنیاد پٹیشن ہے آپ کو جرمانہ بھی کر سکتے تھے لیکن تحمل کا مظاہرہ کر رہے ہیں۔

چیف جسٹس کا کہنا تھا کہ جو بھی مقابلہ کرنا ہے جائیں پارلیمنٹ میں ، پارلیمنٹ سے بڑا فورم اور کوئی نہیں ہے۔

انہوں نے سوال کیا کہ  حکومت کا احتساب پارلیمنٹ خود کرتی ہے آپ عدالت کو پارلیمنٹ کے احتساب میں کیوں لا رہے ہیں؟

چیف جسٹس نے شیخ رشید کو مشورہ دیا کہ عدالتوں کو ان سیاسی معاملات سے دور رکھیں۔

بعدازاں شیخ رشید کی جانب سے استدعا کی گئی کہ پٹیشن واپس لے لیتے ہیں جس پر چیف جسٹس نے ریمارکس جاری کرتے ہوئے کہا کہ اس حوالے سے مناسب آرڈر پاس کریں گے۔