سینیئر وزیر پنجاب میاں اسلم اقبال کا کہنا ہے کہ 13 پارٹیاں بھی جمع ہوجائیں تب بھی خان کا مقابلہ نہیں کرسکتیں۔

پاکستان تحریک انصاف کے رہنما اسلم اقبال نے لاہور میں میڈیا سے گفتگو کرتے ہوئے کہا کہ اعظم سواتی کو رات پکڑلیا گیا اور تشدد کا نشانہ بنایا گیا، ایف آ ئی اے میں اپنے لوگوں کو بٹھایا گیا، کس کس کو گرفتار کر کے اندر کرو گے؟

‘پوری قوم ایک طرف اور چور ایک طرف ہوگئے’

انہوں نے کہا کہ عمران خان کا بیانیہ ٹھیک تھا انہوں نے این آر او ٹو لینا ہے، حکومت میں بیٹھے کرائم منسٹر نے 1100 ارب روپے کے کیسز معاف کرائے، انہوں نے آتے ہی نیب قانون میں ترمیم کی۔

اسلم اقبال نے کہا کہ آپکے ملازمین کے اکاؤنٹس سے اربوں روپیہ نکلا ہے، آپ کیا سمجھتے ہیں عوام بےوقوف بن جائے گی۔

صوبائی وزیر نے کہا کہ عمران خان کے جلسے میں عوام کی تعداد بڑھتی جارہی ہے، پوری قوم ایک طرف اور چور ایک طرف ہوگئے، حکمران اب الیکشن سے بھاگ رہے ہیں۔

‘ہر شخص عمران خان کی کال کے انتظار میں بیٹھا ہے’

سینیئر وزیر پنجاب نے کہا کہ مہنگائی سے عوام کا برا حال ہوگیا ہے، غریب سوچتا ہے کہ بجلی کا بل دوں یا بچوں کو کھانا کھلاؤں۔

اسلم اقبال نےکہا کہ 13پارٹیاں بھی جمع ہوجائیں تب بھی خان کا مقابلہ نہیں کرسکتیں، ہم سب کال کا انتظار کررہے ہیں، ہر شخص عمران خان کی کال کے انتظار میں بیٹھا ہے۔

انہوں نے کہا کہ لانگ مارچ  کی کال جلد ہوگی، 25 مئی کو جو کارکنوں پر ایف آئی آر ہوئی اور تشدد ہوا، بھتیجی کہتی ہے کہ میرے بھائی ارب پتی دادا کے پوتے ہیں، چچا کہتا ہے کہ میرے والد ایک غریب انسان تھے۔

‘آئین اور قانون کے تحت ہر کسی کو احتجاج کا حق ہے’

صوبائی وزیر کا کہنا ہے کہ اگر عوام دو تہائی اکثریت سے حکمران لاتی ہے تو بہتر طریقے سے قانون سازی کی جاسکتی ہے، سترہ جولائی کو بھی ن لیگ نے ہر حلقے میں دس ہزار ووٹ جعلی ڈلوائے۔

میاں اسلم اقبال نے مزید کہا کہ آئین اور قانون کے تحت ہر کسی کو احتجاج کا حق ہے، پولیس کو غنڈہ فورس بنا کر عوام پر چھوڑ دیں۔