آج آزاد جموں و کشمیر کا 75 واں یوم تاسیس جدوجہد آزادی جاری رکھنے کے عہد کی تجدید کے ساتھ آج منایا جا رہا ہے۔

آزادحکومت ریاست جموں وکشمیر کے 75واں یوم تاسیس کی مرکزی تقریب کا انعقاد بھی کیا گیا ہے جس میں قائمقام صدر آزاد کشمیر چوہدری انوارالحق اور وزیر اعظم آزاد کشمیر سراد تنویر الیاس خان نے بطور خصوصی شرکت کی۔

قائم مقام صدر آزاد کشمیر چودہری انوار الحق نے پرچم کشائی کر کے تقریب کا آغاز کیا جبکہ  وزیر اعظم آزاد کشمیر سردار تنویر الیاس کا یوم تاسیس کی تقریب سے خطاب کیا۔

انہوں نے کہا کہ خطے میں قائم ہونے والی حکومت پوری ریاست جموں کشمیر کی حکومت ہے لیکنہندوستان سمجھ نہیں پایا کہ کشمیری آزادی سے کم کسی بات پر راضی نہیں ہوں گے۔

انہوں نے مزید کہا کہ اقوام متحدہ مقبوضہ کشمیر میں اپنی ذمہ داری پوری نہیں کر رہا ہے لیکن سابق وزیر اعظم پاکستان عمران خان کے ویژن کے مطابق کشمیر کی آزادی کے لئے اپنی جدوجہد جاری رکھیں گے۔

وزیر اعظم آزاد کشمیر نے کہا کہ عمران خان ایک عام آدمی کی فلاح چاہتا ہے اور کشمیر کے لئے اگر مجھے اپنے ذاتی وسائل بھی خرچ کرنا پڑے تو گریز نہیں کروں گا۔

ان کا کہنا تھا کہ آزادی کی خوشی ہم اس وقت منائیں گے جب مقبوضہ کشمیر کے کشمیری کو بھی آزادی ملے گی۔

خیال رہے کہ یوم تاسیس 24 اکتوبر 1947 کو ڈوگرہ حکومت سے آزادی کی یاد میں منایا جاتا ہے۔