چودھری پرویز الٰہی نے کہا ہے کہ ترقیاتی وسائل کا بروقت استعمال ضروری ہے۔

تفصیلات کے مطابق وزیراعلیٰ پنجاب چودھری پرویز الٰہی کی زیرصدارت اعلیٰ سطح کا اجلاس ہوا ہے جس میں چودھری پرویز الٰہی کو سالانہ ترقیاتی پروگرام اورصوبے کے مالیاتی امور کے بارے میں بریفنگ دی گئی ہے۔

اجلاس میں پنجاب کے سالانہ ترقیاتی پروگرام پر پیش رفت کا جائزہ لیا گیا جبکہ صوبے کے مالیاتی امور پر بھی غورکیا گیا۔

پنجاب بانڈز کے اجراء کے حوالے سے سفارشات مرتب کرنے کے لئے کمیٹی تشکیل دی گئی جبکہ پرویزالٰہی نے پنجاب پنشن فنڈ میں اصلاحات کے حوالے سے جامع پلان بھی طلب کر لیا گیا۔

اس موقع پر چودھری پرویز الٰہی نے صوبے کے وسائل میں اضافے کے لئے مقرر کردہ ٹارگٹ پورا کرنے اور پنجاب بانڈز کے اجراء کا جائزہ لینے کی ہدایت دی ہے۔

وزیراعلیٰ پنجاب چودھری پرویز الٰہی نے مزید ہدایت دی کہ سالانہ ترقیاتی پروگرام کے تحت منصوبوں کو مقررہ مدت کے اندر مکمل کیا جائے، ترقیاتی سکیموں اور فلاح عامہ کے پروگراموں پر کام کی رفتار تیز کی جائے جبکہ سالانہ ترقیاتی پروگرام کے تحت منصوبوں کو مقررہ مدت کے اندر مکمل بھی کیا جائے۔

اجلاس کی صدارت کرتے ہوئے چودھری پرویز الٰہی نے کہا کہ منصوبوں کی بروقت تکمیل سے نہ صرف وسائل کا درست استعمال یقینی بنایا جا سکتا ہے بلکہ عوام بھی ترقیاتی منصوبوں کے ثمرات سے مستفید ہوتے ہیں۔

انہوں نے کہا کہ ہماری حکومت ڈلیوری پر یقین رکھتی ہے، اگلے ہفتے متعلقہ حکام جامع پلان پیش کریں گے، عوام کی فلاح و بہبود کیلئے جاری پروگرامز کو جلد سے جلد مکمل کیا جائے گا جبکہ تعلیم اورصحت کیساتھ پینے کے صاف پانی کی فراہمی کے منصوبے بھی ترجیحی بنیادوں پر مکمل کیے جائیں۔

ان کا کہنا تھا کہ ترقیاتی وسائل کا بروقت استعمال ضروری ہے، اہداف کا حصول مقررہ مدت میں یقینی بنانا متعلقہ اداروں اورمحکموں کی ذمہ داری ہے جبکہ محکمے جاری کردہ فنڈز کا درست اور بروقت استعمال یقینی بنائیں گے۔

ان کا یہ بھی کہنا تھا کہ پرائیویٹ سیکٹر کے ذریعے گروتھ میں اضافے اور سرمایہ کاری کو فروغ دیا جائے، ترقیاتی حکمت عملی کے ذریعے متوازن علاقائی ترقی کی منزل حاصل کی جائے اور صوبے کے وسائل میں اضافے کیلئے ٹھوس اقدامات کیے جائیں۔

وزیراعلیٰ پنجاب چودھری پرویز الٰہی نے مزید کہا کہ ریونیو میں اضافے سے صوبے کے عوام کو زیادہ سے زیادہ بنیادی سہولتیں دی جائیں اور پنجاب پنشن فنڈ کے ذریعے پنشن کے واجبات کی ادائیگی کے لئے اس کا بہترین مصرف یقینی بنایا جائے۔

اجلاس میں صوبائی وزیر خزانہ محسن لغاری، سابق وفاقی وزیر مونس الٰہی، چیف سیکرٹری، سیکرٹری خزانہ، سیکرٹری پلاننگ اینڈ ڈویلپمنٹ، سیکرٹری تعمیرات ومواصلات اور متعلقہ حکام نے شرکت کی۔