حیدرآباد: اپوزیشن لیڈر سندھ اسمبلی حلیم عادل شیخ نے کہا ہے کہ سندھ حکومت ہمیں ہر روز جھوٹے مقدمات میں پھنسا رہی ہے۔

حلیم عادل شیخ نے عدالت کے باہر میڈیا سے گفتگو کرتے ہوئے کہا کہ ہم عدالتوں کا احترام کرتے ہیں اور پیش ہورہے ہیں، عمران خان نے بھی عدالت میں پیش ہوکر عدلیہ کی عزت کے لیے معذرت کی۔

‘جھوٹے مقدمات سے ہمیں رلیف مل جاتا ہے’

انہوں نے کہا کہ سندھ حکومت ہمیں ہرروز جھوٹے مقدمات میں پھنسا رہی ہے، ہم عدالت جاتے ہیں تو جھوٹے مقدمات سے ہمیں رلیف مل جاتا ہے۔

اپوزیشن لیڈر سندھ اسمبلی کا کہنا ہے کہ ناقص پراسیکیوشن کی وجہ سے بڑے بڑے مجرم آزاد ہورہے ہیں، 34 سال پرانہ مقدمہ مجھ پر بنادیا گیا ہے۔

یہ بھی پڑھیں؛ اینٹی کرپشن اختیارات کے ناجائز استعمال کا معاملہ، حلیم عادل شیخ کی درخواست خارج

حلیم عادل شیخ نے مزید کہا کہ اس کیس کا ریکارڈ ان کے پاس موجود نہیں وہ بھی مجھ سے مانگا جارہا ہے، علی بابا چالیس چوروں کے کہنے پر جھوٹے مقدمات بنائے جارہے ہیں۔

حلیم عادل شیخ حیدرآباد اینٹی کرپشن کی عدالت میں پیش

تحریک انصاف کے رہنما اور قائدِ حزبِ اختلاف سندھ اسمبلی حلیم عادل شیخ جامشورو میں اینٹی کرپشن کے مقدمے میں اینٹی کرپشن حیدرآباد کی عدالت میں پیش ہوئے۔

سرکاری وکیل نے عدالت سے کاغذات مکمل نہ ہونے کی وجہ بیان کرکے مزید وقت مانگ لیا۔

سماعت کے دوران سرکاری وکیل کے وقت مانگنے پر معزز جج کی جانب سے سرکاری وکیل کی سرزنش کی گئی۔

عدالت نے سرکاری وکیل کو اگلی پیشی پر مکمل کاغذات کے ساتھ پیش ہونے کا حکم دیتے ہوئے سماعت کی کارروائی 12 نومبر تک ملتوی کردی۔