پاکستان تحریک انصاف کے سینئر رہنما مراد سعید نے کہا ہے کہ دشمن عمران خان کو سیاسی اور انتخابی میدان سے ناک آؤٹ کرنا چاہتے ہیں۔

تفصیلات کے مطابق مراد سعید نے اپنے ایک بیان میں کہا کہ چیف الیکشن کمشنر نے ن لیگ کی بی ٹیم کا کردار ادا کیا ہے، سب عمران خان کو سیاسی اور انتخابی میدان سے ناک آؤٹ کرنے کا فیصلہ کرنا چاہتے ہیں۔

ان کا کہنا تھا کہ عمران خان سے لوگوں کی محبت کا اظہار ہے کہ لوگ سڑکوں پر نکلے، کچھ دن قبل ایک پیغام موصول ہوا، ممبر الیکشن کمیشن نے عمران خان کو پیغام پہنچایا، ممبر الیکشن کمشنر نے کہا کہ مجھ پر پریشر ہے کہ عمران خان کے خلاف فیصلہ کرنا ہے۔

انہوں نے کہا کہ آڈیو لیکس میں سب سامنے آیا تھا کہ کون کون بیٹھ کر کیا کیا باتیں کر رہا ہے، چیف الیکشن کمشنر اور ن لیگ کا گٹھ جوڑ سامنے آگیا ہے، متنازعہ فیصلوں کا سب کو پتہ تھا، یہ سیاسی اور انتخابی میدان میں عمران خان کا مقابلہ نہیں کر سکتے۔

مراد سعید نے کہا کہ عمران خان نے کال نہیں دی اور لوگ سڑکوں پر ہیں، نواز شریف سڑکوں پر پھر رہا تھا کہ مجھے کیوں نکالا؟ جو بھی حق کا ساتھ دیتا ہے وہ مار دیا جاتا ہے۔

واضح رہے کہ الیکشن کمیشن آف پاکستان نے توشہ خانہ ریفرنس میں عمران خان کو نااہل قرار دے دیا ہے جس کے باعث ملک بھر میں احتجاج جاری ہے۔