پاکستان تحریک انصاف کے چیئرمین عمران خان کی زیرصدارت پنجاب کابینہ کے وزراء اجلاس کی اندرونی کہانی سامنے آگئی ہے۔

تفصیلات کے مطابق اجلاس میں پنجاب کابینہ نے سوشل میڈیا کے نوجوانوں کی گرفتاری میں پولیس کی ایف آئی اے کی معاونت پر شدید ردعمل دیا۔

 پنجاب کابینہ نے آئی جی پنجاب پولیس سے پولیس معاونت پر وضاحت طلب کرنے کا فیصلہ کیا۔

ذرائع کے مطابق رات گئے حکومت پنجاب نے کابینہ ارکان کے فیصلے کی روشنی میں وضاحتی لیٹر لکھ دیا۔

پنجاب کابینہ کا کہنا تھا کہ آئی جی پنجاب پولیس اس بات کی تحقیق کریں کہ ایف آئی اے نے کیا ایکشن کی اجازت لی، پنجاب پولیس نے ایف آئی اے کے ساتھ بلا اجازت کیسے گرفتاری اور غیرقانونی کام میں معاونت کی۔

پنجاب کابینہ نے کہا کہ ایلیٹ فورس کی گاڑیاں کس طرح اس غیر قانونی آپریشن میں بلااجازت استمعال ہوئیں۔ پولیس کا کوئی ماورائے آئین و قانون ایکشن قابل قبول نہیں۔

دوران اجلاس عمران خان کی ہدایت پر پنجاب کابینہ کی جانب سے آئی جی پنجاب سے وضاحت طلب کرنے کا فیصلہ کیا گیا۔

اجلاس میں کابینہ ارکان نے فیصلہ کیا کہ پولیس وفاقی ادارے کے کسی غیر آئینی غیر قانونی ایکشن میں ساتھ نہ دے۔

واضح رہے کہ گزشتہ روز عمران خان کی زیر صدارت ہونے والے اجلاس میں سوشل میڈیا کے نوجوانوں کی گرفتاری اورپولیس کے کردار کا تفصیلی جائزہ لیا گیا۔