تحریک انصاف کے لانگ مارچ کو بڑا دھچکا،پی ٹی آئی کے 4 ارکان اسمبلی نے پارٹی چھوڑ نے کا اعلان کر دیا۔

ذرائع کے مطابق سردار خرم لغاری ایم پی اے پی ٹی آئی کا کہنا ہےکہ  میں نے تحریک انصاف چھوڑنے کا فیصلہ کیاہے۔

سردار خرم لغاری نے اس اعلان کے ساتھ یہ بھی دعویٰ کیا کہ ان  کےساتھ پانچ سے چھ ایم پی ایز پارٹی چھوڑ رہے ہیں، عبدالحئی دستی اور علمدار قریشی نے بھی پارٹی چھوڑنے کا فیصلہ کیا ہے۔

ٰان کا کہنا ہےکہ ہمیں دکھایا کچھ گیا اور کیا گیا کچھ اور، اسمبلی سے بھی ممکن ہے استعفی دیں گے۔

خرم لغاری نے بتایاکہ تین، چار دن میں اسمبلی سے مستعفی ہوسکتے ہیں، ہمیں بتایا جائے کہ وزیر بنانے کا کیا معیار ہے۔

ان سے صحافی نے سوال کیاکہ کیا اپ وزرات نہ ملنے پر ناراض ہیں؟

اس کے جواب میں خرم لغاری نے کہاکہ  وزارت کو جوتے کی نوک پر رکھتا ہوں ۔

عمران خان کی قیادت میں لانگ مارچ کا آغاز

سابق وزیراعظم عمران خان کی قیادت میں پی ٹی آئی کے لانگ مارچ کا آغاز ہوگیا۔

تفصیلات کے مطابق تحریک انصاف کے لانگ مارچ کا آغاز آج سےلبرٹی چوک لاہور سے ہوگا تاہم عمران خان لانگ مارچ کی قیادت کریں گے۔

لانگ مارچ کے متعلق چیئرمین پی ٹی آئی عمران خان نے حکمت عملی واضح کردی ہے جس کے مطابق لاہور میں لانگ مارچ میں عوام پیدل چلیں گے جبکہ گاڑیاں پیچھے ہوں گی۔

عمران خان کا کہنا ہے کہ جہاں جہاں آبادی سے لانگ مارچ گزرے گا لوگ پیدل چلیں گے اور اگلے جمعہ کو ہم راولپنڈی پہچیں گے۔

 پاکستان تحریک انصاف کے لانگ مارچ کے حوالے سے پارٹی کی سینئر قیادت نے اپنی تمام تر تیاریاں مکمل کرلی ہیں تاہم مختلف شہروں سے قافلے پارٹی رہنماں کی قیادت میں عمران خان کے لانگ مارچ میں شریک ہونگے۔

آخری فیصلہ، اٹل فیصلہ
مافیا نامنظور، نامنظور #حقیقی_آزادی_مارچ pic.twitter.com/3oGDV50Fjl

Advertisement

— PTI (@PTIofficial) October 28, 2022

کراچی سے قافلہ پیر کی صبح اسلام آباد کیلئے روانہ ہوگا جبکہ منگل کو سکھر سے قافلے کی روانگی ہوگی۔

اسکے علاوہ لانگ مارچ کیلئے بلوچستان سے اتوار کو روانہ ہونگے اور کوئٹہ سے براستہ ژوب اسلام آباد پہنچیں گے۔

لانگ مارچ کا شیڈول:

پہلے دن لانگ مارچ لاہور میں ہی رہے گا جبکہ لبرٹی چوک سے لانگ مارچ اچھرہ، مزنگ،ایم او کالج۔ جنرل پوسٹ آفس چوک ،داتا دربارسے آزادی چوک پہنچے گا ۔

لانگ مارچ اگلے دن شاہدرہ سے شروع ہو گا جبکہ دوسرے روز مریدکے ،کامونکی سے گوجرانوالہ پہنچے گا۔

لانگ مارچ ڈسکہ سے ہوتا ہوا سیالکوٹ پہنچے گا جبکہ سمبڑیال، وزیر آباد سے ہوتا ہوا گجرات پہنچے گا اور لالہ موسی کھاریاں سے جہلم جائے گا ۔

لانگ مارچ گوجر خان سے راولپنڈی اور چار نومبر راولپنڈی سے اسلام آباد داخل ہوگا ۔

سیکیورٹی پلان:

آئی جی پنجاب نے لانگ مارچ کے روٹس پر سکیورٹی کے فول پروف انتظامات یقینی بنانے کی ہدایت دی ہے  اور کہا ہے کہ لاہور، گوجرانولہ، گجرات اور راولپنڈی سمیت دیگر شہروں میں سیکیورٹی کے خصوصی انتظامات کیے جائیں۔

آئی جی پنجاب کا کہنا تھا کہ موٹروے کے داخلی و خارجی راستوں اور بین الصوبائی رابطہ سڑکوں پر خصوصی انتظامات کیے جائیں اور لانگ مارچ کے دوران امن و امان کی صورتحال کو ہر صورت یقینی بنایا جائے۔

آئی جی پنجاب  نے بتایا کہ سنٹرل پولیس آفس میں قائم کنٹرول روم سے لانگ مارچ کی سیکیورٹی کو بھی مانیٹر کیا جائے اس حوالے سے مارچ کے روٹس کو سی سی ٹی وی کیمروں سے مانیٹر کرنے کی ہدایت بھی کردی گئی ہے۔

آئی جی پنجاب نے پولیس کو روٹ کے اضلاع میں سرچ اینڈ کومبنگ آپریشنز میں تیزی لانے کی ہدایت بھی کی ہے۔