پاسما اور کاشتکاروں نے وفاق سے مطالبہ کیا ہے کہ ملک میں چینی کا بڑا اسٹاک موجود ہے، وفاق ایکسپورٹ کرنے کی اجازت دے۔

تفصیلات کے مطابق سندھ حکومت کا گنے کی قیمت مقرر اورکریشنگ شروع کرنے سے متعلق شگر کین بورڈ کا اجلاس ہوا جس کی صدارت مشیر زراعت منظورحسین وسان نے کی۔

اجلاس میں مشیر زراعت منظور وسان نے کہا کہ گنے کی قیمت اور کریشنگ شروع کرنے سے متعلق آئندہ اجلاس میں فیصلہ کیا جائے۔

کاشتکار رہنما نے اجلاس میں کہا کہ سندھ کے کاشتکاروں نے سندھ حکومت سے 320 روپے سے 330 روپے تک گنے کی سرکاری قیمت مقرر کرنے کا مطالبہ کیا ہے۔

‘کوشش ہے کہ جلد از جلد سندھ میں شگر ملیں چلائی جائیں’

منظوروسان نے کہا کہ گزشتہ سال بھی گنے کی قیمت اچھی مقررکی تھی، سندھ سرکار نے ہمیشہ کی طرح کسانوں کو سپورٹ کی ہے۔

انہوں نے کہا کہ قانون کے مطابق سندھ میں 30 نومبر تک کریشنگ شروع ہوتی ہے، کوشش ہے کہ جلد از جلد سندھ میں شگر ملیں چلائی جائیں۔

پاسما اور کاشتکاروں نے اجلاس میں وفاق سے مطالبہ کیا ہے کہ ملک میں چینی کا بڑا اسٹاک موجود ہے، وفاق ایکسپورٹ کرنے کی اجازت دے۔

شگر ملز مالکان کا کہنا ہے کہ سندھ حکومت سے کہا ہے کہ وہ وفاق سے چینی ایکسپورٹ کرنے کے متلعق بات کرے۔

خیال رہے کہ اجلاس میں سیکریٹری زراعت اعجاز مہیسر، ڈی جی زراعت سمیت دیگرممبران شریک ہوئے۔

اس کے علاوہ سندھ آبادگار بورڈ، سندھ چیمبر آف ایگریکلچر اور پاسما سمیت دیگر رہنما بھی اجلاس میں شریک تھے۔