وزیراعظم کی جانب سے پاکستان کے سینئر صحافی و اینکر پرسن ارشد شریف کے معاملے کی تحقیقات کرانے کا فیصلہ کیا گیا ہے۔

تفصیلات کے مطابق وفاقی وزیر اطلاعات مریم اورنگزیب نے اپنے جاری کردہ ایک بیان میں واضح کیا ہے کہ سینئر صحافی ارشد شریف کے جاں بحق ہونے کے معاملے وزیراعظم نے ہائی کورٹ کے جج کی سربراہی میں جوڈیشل کمیشن بنانے کا فیصلہ کیا ہے ۔

انہوں نے بتایا ہے کہ عدالتی کمیشن کے سربراہ حقائق کے تعین کے لئے سول سوسائٹی اور میڈیا سے بھی رکن لے سکیں گے ۔

وزیر اطلاعات کا کہنا تھا کہ وزیراعظم نے یہ فیصلہ مرحوم ارشد شریف کے جاں بحق ہونے کے اصل حقائق کے تعین کے لئے کیا ہے۔

اس حوالے سے وزیراعظم نے اپنےٹوئٹر اکاؤنٹ پر ایک پیغام بھی جاری کیا ہے۔

I have decided to form a Judicial Commission to hold an inquiry into the killing of journalist Arshad Sharif in order to determine the facts of the tragic incident in a transparent & conclusive manner.

— Shehbaz Sharif (@CMShehbaz) October 25, 2022

خیال رہے کہ گزشتہ روز وزیر اعظم شہباز شریف نے کینیا کے صدر ولیم روٹو کو فون کیا اور سینئر صحافی ارشد شریف کے انتقال پر پاکستانی عوام اور صحافتی برادری کی جانب سے شدید تشویش کا اظہار کیا۔

اس موقع پر وزیراعظم نے واقعے کی غیر جانبدارانہ اور شفاف تحقیقات پر زور دیا۔

وزیراعظم نے کینیا کے صدر سے درخواست کی کہ ارشد شریف کی میت کی واپسی کے لیے ضابطے کی کارروائی مکمل کی جائے۔

واقعے پر گہرے افسوس کا اظہار کرتے ہوئے کینیا کے صدر نے یقین دلایا کہ کیس میں انصاف کے تقاضے پورے کیے جائیں گے اور تحقیقاتی رپورٹ جلد جاری کی جائے گی۔

انہوں نے وزیراعظم شہباز شریف کو یقین دلایا کہ میت کی پاکستان واپسی کا عمل جلد مکمل کیا جائے گا۔

واضح رہے کہ گزشتہ رات سینئر صحافی ارشد شریف کا جسد خاکی پاکستان بذریعہ دوحہ رووانہ کردیا گیا ہے جو کہ آج رات اسلام آباد ایئرپورٹ پہچے گا تاہم مرحوم کی تدفین بروز جمعرات کو کی جائیگی۔