امریکی سفیر ڈونلڈ بلوم نے کہا ہے کہ قدرتی آفات سے متاثرہ بھائیوں کو مشکل وقت میں اکیلا نہیں چھوڑیں گے۔

تفصیلات کے مطابق امریکی سفیر ڈونلڈ بلوم نے سندھ کے سیلاب متاثرہ علاقوں کا دورہ کیا ہے جس میں انہوں نے پاکستان کیلئے تین کروڑ ڈالرز اضافی امداد کا اعلان بھی کیا ہے۔

ڈونلڈ بلوم نے سیلاب متاثرین میں خیمے، بیت الخلا، حفظان صحت کی کٹس اور دیگر امدادی سامان تقسیم کیا اور امریکی حکومت کی جانب سے فراہم کردہ عارضی پناہگاہوں کا جائزہ بھی لیا۔

امریکی سفیر نے کہا کہ رواں سال امریکا نے پاکستان کو تخمینہ 9 کروڑ 70 لاکھ ڈالرز فراہم کیے ہیں۔

انہوں نے کہا کہ اضافی مالی امداد سے نہ صرف سیلاب متاثرین کی ہنگامی ضروریات پوری کرنے میں مدد ملے گی جبکہ اضافی امداد کے تحت یو ایس ایڈ کے ذریعے غذائی اشیاء اور طبی خدمات بھی فراہم کی جائیں گی۔

ان کا کہنا تھا کہ متاثرین  کی بحال اور سردیوں سے بچنے کیلئے ساز و سامان کی فراہمی امداد کا حصہ ہے جبکہ امریکی حکومت جنسی امتیاز اور تشدد کی روک تھام کیلئے بھی پاکستان کے ساتھ تعاون بڑھانے کیلئے پرعزم ہے۔

اس موقع پر امریکی سفیر ڈونلڈ بلوم نے پاکستان میں حالیہ سیلاب کی وجہ سے ہونے والی تباہ کاریوں پر گہرے افسوس کا اظہار کیا اور مزید کہا کہ قدرتی آفات سے متاثرہ بھائیوں کو مشکل وقت میں اکیلا نہیں چھوڑا جائیگا۔

امریکی سفیر کے ہمراہ یو ایس ایڈ کے شراکتدار ادارے ایکٹیڈ کے عہدیداران بھی موجود تھے۔