سابق وزیراعظم اور چیئرمین پی ٹی آئی پر قاتلانہ حملے کے بعد پیدا ہونے والی صورتحال پر وزیراعظم نے آج اتحادی جماعتوں کا اجلاس طلب کرلیا ہے۔

تفصیلات کے مطابق وزیر اعظم شہبازشریف نے اتحادی جماعتوں کا اہم اجلاس آج وزیر اعظم ہاوس میں بلالیا ہے۔

وزیر اعظم شہبازشریف اتحادی جماعتوں کے قائدین سے عمران خان پر حملے کے بعد کی صورتحال پر غور ہوگا وزیر اعظم ہاوس کی طرف سے اتحادی جماعتوں کے قائدین کو اجلاس میں شرکت کی دعوت دی ہے۔

اجلاس کے دوران اتحادی جماعتوں کے قائدین تحریک انصاف کے قیادت کی طرف سے لگائے گئے الزامات پر جوابی بیانیہ تیار کریں گے۔

خیال رہے کہ گزشتہ روز لانگ مارچ کے دوران چیئرمین پی ٹی آئی کے کنٹینر پر فائرنگ کا واقعہ پیش آیا ہے جس کے نتیجے میں عمران خان اور پی ٹی آئی کے مرکزی رہنماؤں سمیت 13 افراد زخمی ہوگئے ہیں۔

ابتدائی اطلاعات کے مطابق فائرنگ کے اس واقعے کو عمران خان پر قاتلانہ حملہ قرار دیا گیا ہے جس میں سینیٹر فیصل جاوید بھی شدید زخمی ہوئے ہیں جب کہ حامد ناصر چٹھہ کے صاحبزادے احمد چٹھہ اور چوہدری محمد یوسف بھی زخمی ہیں۔

فائرنگ کے باعث عمران خان کی ٹانگ پر گولی لگی ہے جس کے باعث وہ معمولی زخمی ہوئے ہیں۔ سیکیورٹی اہلکاروں نے عمران خان کو کنٹینر کے اندر فورا نیچے محفوظ جگہ پر منتقل کیا۔