پاکستان تحریک انصاف (پی ٹی آئی) کے لانگ مارچ کی سیکیورٹی انتظامات کیلئے وزارت داخلہ نے مزید فنڈز مانگ لئے ہیں۔

تفصیلات کے مطابق اسلام آباد انتظامیہ کے اخراجات دن با دن بڑھنے لگے ہیں، وزرات داخلہ کو عمران خان لانگ مارچ کی سیکیورٹی انتظامات کیلئے مزید فنڈز درکار ہیں۔

ذرائع نے بتایا کہ وزارت داخلہ نے وزارت خزانہ سے مزید ساٹھ کروڑ سے زائد فنڈز مانگ لیے ہیں، تحریک انصاف کا لانگ مارچ قومی خزانے پر بھاری پڑ گیا ہے۔

ذرائع کے مطابق وفاقی دارالحکومت کی سیکیورٹی کے لیے لائے گئے کنٹینرز کا کرایہ ایک ارب روپے سے بڑھ گیا ہے جبکہ وفاقی حکومت پہلے ہی کنٹینرز مالکان کو 40 کروڑ روپے ادا کرچکی ہے۔

ذرائع کا کہنا ہے کہ ایک کنٹینر کا ہفتہ وار کرایہ ایک لاکھ 25ہزار روپے ادا کیا جا رہا ہے جبکہ کنٹینرز کا کرایہ ایک ارب روپے سے بڑھ چکا ہے۔

ذرائع نے مزید بتایا کہ کرائے کی مد میں مزید60 کروڑ روپے سے زائد رقم درکار ہے جبکہ وفاقی دارالحکومت میں اس وقت 1600 سے زائد کنٹینرز رکھے گئے ہیں۔

لانگ مارچ 26 نومبر تک کے لیے مؤخر

خیال رہے کہ تحریک انصاف کا دوسرے مرحلے کا جاری لانگ مارچ 26 نومبر تک کے لیے مؤخر کر دیا گیا۔

 پی ٹی آئی کے تمام مرکزی اور صوبائی رہنما اپنے اپنے حلقوں میں 26 نومبر کے لیے تیاریاں کریں گے۔

 25 نومبر کو عمران خان زمان پارک سے اسلام آباد کے لیے روانہ ہوں گے اور اسلام آباد پہنچنے پر دھرنے یا جلسے کا فیصلہ کیا جائے گا۔ اس کے بعد اسلام آباد دھرنے یا جلسے کی جگہ پر قیام کے لیے خیمہ بستی قائم کی جائے گی۔

علاوہ ازیں اسلام آباد دھرنے یا جلسے کی کامیابی کے لیے آئندہ چند روز میں ایک اعلیٰ سطحی کمیٹی بھی قائم کی جائے گی، دھرنے یا جلسے کے لیے دو مقامات زیر غور ہیں، کارکنان کی سہولت اور قیادت کے فیصلے کے پیش نظر حتمی مقام کا تعین کیا جائے گا۔

واضح رہے کہ پاکستان تحریک انصاف کے چیئرمین عمران خان نے 26 نومبر کو راولپنڈی پہنچنے کی کال دے دی ہے۔