سندھ حکومت کی جانب سے اپوزیشن لیڈر حلیم عادل شیخ سمیت انکے ساتھیوں، رشتیدارو‍ں پر جھوٹے مقدمات کا سلسلہ جاری ہے۔

ترجمان حلیم عادل شیخ نے بتایا کہ حلیم عادل شیخ کے خلاف سندھ حکومت نے 28 واں مقدمہ درج کیا ہے۔

ترجمان کا کہنا ہے کہ رجیم چینج کے سہولتکار سندھ میں اپنے خلاف ہر آواز سے خوفزدہ ہیں، رات کے وقت بغیر سرچ وارنٹ گھر میں گھس کر توڑ پھوڑ کی گئی، گھر میں شادی تقریب کیلئے موجود مہمانوں کو ہراساں کر کے دھمکیاں دی گئی۔

ترجمان نے کہا کہ چیف جسٹس، انسانی حقوق کی تنظیموں سے سندھ میں بدترین پامالی پر نوٹس کی اپیل کرتے ہیں۔ سندھ میں انسانی حقوق صرف بلاول ہاؤس کی میراث ہیں، بلاول ہاؤس میں بیٹھے ڈاکو حلیم عادل شیخ کو جان سے مارنا چاہتے ہیں۔

ترجمان حلیم عادل شیخ نے کہا کہ ان خطرات کے حوالے سے چیف جسٹس کو آگاہ کرچکے ہیں اور تمام تر صورتحال پر چیف جسٹس آف پاکستان کو بھی آگاہ کررہے ہیں۔

ترجمان کا کہنا ہے کہ گزشتہ رات پیش آنے والی پولیس گردی پر عدالت سے رجوع کریں گے، آئی جی سندھ صرف چابی کے کھلونے ہیں ان سے کوئی امید نہیں۔

ترجمان حلیم عادل شیخ نے مزید کہا کہ پی ٹی آئی کی مرکزی، صوبائی قیادت، اراکین اسمبلی اس معاملے پر مکمل ساتھ کھڑے ہیں۔

حلیم عادل شیخ لاہور پہنچ گئے

سندھ اسمبلی میں اپوزیشن لیڈر حلیم عادل شیخ لاہور پہنچ گئے۔

حلیم عادل شیخ کی گرفتاری کے لیے گزشتہ رات کراچی پولیس نے متعدد چھاپے مارے تھے، انکے خلاف کراچی پولیس نے سنگین نوعیت کے مقدمات کا اندراج کر رکھا ہے۔

ذرائع نے بتایا کہ حلیم عادل شیخ آج سہ پہر پی ٹی آئی کے چیئرمن عمران خان سے زمان پارک میں ملاقات کریں گے اور عمران خان کو اپنے خلاف مقدمات اور سندھ حکومت کی مبینہ انتقامی کارروائیوں کے حوالے سے آگاہ کریں گے۔

ترجمان حکومت پنجاب نے بتایا کہ حلیم عادل شیخ ملاقات کے بعد زمان پارک کے باہر میڈیا سے گفتگو بھی کریں گے۔