ایڈمنسٹریٹر کراچی بیرسٹر مرتضیٰ وہاب نے کہا ہے کہ پاکستان میں تیار کئے جانے والے کپڑے اور دیگر اشیاء کو دنیا بھر میں پسندیدگی کی نگاہ سے دیکھا جاتا ہے۔۔

تفصیلات کے مطابق ایڈمنسٹریٹر کراچی بیرسٹر مرتضیٰ وہاب نے ٹیکسٹائل ڈیزائننگ کے تیسرے منی تھیسز شو کے افتتاح کے موقع پر تقریب سے خاب کرتے ہوئے کہا کہ پاکستان کی مختلف یونیورسٹیز ٹیکسٹائل ڈیزائننگ میں باقاعدہ تعلیم دے رہی ہیں، جس میں ملکی مصنوعات برآمد کرنے کے وسیع امکانات موجود ہیں۔

انہوں نے کہا کہ ٹیکسٹائل ڈیزائننگ میں جو طلباء تعلیم حاصل کررہے ہیں ان کے لئے روزگار موجود ہیں اور پاکستان کی ایک پہنچان ٹیکسٹائل کی مصنوعات ہیں۔

انہوں نے مزید کہا کہ پاکستان ٹیکسٹائل کی مصنوعات کو بیرون ملک برآمد کرکے بڑے پیمانے پر زر مبادلہ حاصل کرسکتا ہے جس میں کمپیوٹرائزڈ ڈیزائننگ نے اس شعبے میں جدت، وسعت اور ٹیکنالوجی کے استعمال کے وسیع مواقع پیدا کردیئے ہیں۔

مرتضیٰ وہاب کا کہنا تھا کہ ٹیکسٹائل ڈیزائننگ کے شعبے کے طلباء با صلاحیت ہیں اور جدید رجحانات کا مقابلہ کرنے کی صلاحیت رکھتے ہیں۔

ان کا کہنا تھا کہ آرٹس کونسل میں کوئی تفریق نہیں ہے ، آرٹس اسکول کے ذریعے بچوں کی تربیت ہورہی ہے اور یہاں پر خصوصی بچوں کو دیکھ کر بھی خوشی ہوئی ہے کیونکہ وزیر اعلیٰ کا وژن ہے کہ خصوصی بچوں کو آگے لایا جائے ۔

انہوں نے بتایا کہ کراچی کے مختلف علاقوں کے بچے جو بڑے اسکول میں جاکر اپنے ٹیلنٹ کو اجاگر نہیں کرسکتے ہیں وہ یہاں آکر اپنے ٹیلنٹ کو اجاگر کرتے ہیں ۔

انہوں نے کہا کہ سندھ حکومت کے تعاون سے آرٹس کونسل کام کررہی ہے ، یہاں بڑے بڑے پروگرام ہوتے ہیں  اور دنیا میں ہم اپنی نمائندگی کو آگے لیکر جاتے ہیں۔