حکومتی اتحاد کی جانب سے وزیراعظم شہباز شریف سے مطالبہ کیا گیا ہے کہ ملک کی معاشی صورتحال میں بہتری اور مہنگائی میں کمی پر توجہ دی جائے۔

اس حوالے سے ذرائع کا کہنا ہے کہ ملکی سیاسی صورتحال اور اہم تقرری کے معاملے پر وزیراعظم شہباز شریف کی موجودگی میںقائد ن لیگ نواز شریف کے اتحادی جماعتوں کے رہنماؤں سے رابطے ہوئے ہیں۔

رابطوں کے دوران نواز شریف نے آصف زرداری، فضل الرحمان، اختر مینگل، خالد مقبول صدیقی، محمود اچکزئی سے عمران خان کے لانگ مارچ پر گفتگو کی گئی۔

اس موقع پر رہنماؤں کی جانب سے اتفاق کیا گیا ہے کہ احتجاج لانگ مارچ عمران خان کا حق ہے لیکن ملکی سلامتی پر کوئی سمجھوتا نہیں کیا جائیگا۔

علاوہ ازیں پی ڈی ایم رہنماؤں کیجانب سے اہم تقرری کے معاملے پر کسی قسم کا کوئی دباؤ قبول نہ کرنے پر بھی اتفاق کیا گیا ہے۔

اس موقع پر اتحادیوں نے مطالبہ کیا ہے کہ ملک کی معاشی صورتحال میں بہتری اور مہنگائی میں کمی پر توجہ دی جائے۔

ذرائع کا کہنا ہے کہ شہباز شریف وطن واپسی پر پی ڈی ایم کا اجلاس بلا کر سب کو اعتماد میں لیں گے اور عام انتخابات سمیت دیگر سیاسی فیصلے بھی مشاورت سے کرنے پر اتفاق  کیا گیا ہے۔

یاد رہے کہ وزیراعظم شہباز شریف دورہ مصر مکمل کرنے کے بعد قائد مسلم لیگ ن میاں محمد نواز شریف سے ملاقات کے لئے پہنچےتھے۔

لندن میں ملک کی سیاسی اور معاشی صورتحال پر اہم اجلاس بھی منعقد کیا  گیا تھا جبکہ اتحدیوں سے بھی رابطے کر کے اہم فیصلوں میں مشاورت کی گئی تھی۔