ترجمان پنجاب حکومت کا کہنا ہے کہ پاکستان تحریک انصاف اسمبلیوں کے حوالے سے اپنے فیصلے پر قائم ہے تاہم حتمی وقت کا اعلان کا اختیار پارٹی نے عمران خان کو دیا ہے۔

تفصیلات کے مطابق ترجمان وزیراعلیٰ و پنجاب حکومت مسرت جمشید چیمہ نے اپنے ایک پیغام میں کہا ہے کہ انشاءاللہ ہم پنجاب اور پختونخواہ میں انتخابات کے بعد پہلے سے زیادہ اکثریت سے حکومت بنائیں گے۔

انہوں نے کہا کہ ڈمی حکومت کے دن گنے جاچکے ہیں، امپورٹڈ حکومت کو عوام الیکشن کروانے پر مجبور کریں گے۔

انہوں نے مزید کہا کہ پی ڈی ایم کا چور ٹولہ حقیقی آزادی کے سفر میں کوئی رکاوٹ نہیں ڈال سکتا ہے اور وزیراعلیٰ پنجاب کیخلاف تحریک عدم اعتماد بلی کے خواب میں چھچھڑوں کے مترادف ہے۔

خیال رہے کہ گزشتہ روز ہونے والے ملاقات کے دوران پیپلزپارٹی اور مسلم لیگ ن کی جانب سے وزیراعلیٰ پنجاب کے خلاف تحریک عدم اعتماد لانے کا فیصلہ کیا گیا ہے۔

 اس حوالے سے ذرائع نے بتایا کہ ن لیگ نے پرویز الہیٰ کے خلاف تحریک عدم اعتماد لانے کا فیصلہ کر لیا ہے، پیپلزپارٹی کے مشاورت کے بعد جلد ہی تحریک عدم اعتماد پنجاب اسمبلی میں پیش کی جائے گی۔

ذرائع کا کہنا ہے کہ مسلم لیگ ن نے تمام ایم پی ایز کو ارکان پنجاب اسمبلی سے تحریک عدم اعتماد پر دستخط کروا لئے گئے ہیں تاہم ضرورت پڑنے پر وزیر اعلیٰ پنجاب پرویز الہیٰ کے خلاف تحریک عدم اعتماد جمع کروا دی جائیگی۔