ڈاکٹر احمد جاوید قاضی نے کہا ہے کہ چین کی جانب سے پنجاب میں صحت کے شعبہ میں تعاون لائق تحسین ہے۔

تفصیلات کے مطابق سیکرٹری صحت پنجاب ڈاکٹر احمد جاوید قاضی کی اپنے دفتر میں چائنیز وفد کے ساتھ ملاقات ہوئی ہے۔

ملاقات میں سیکرٹری صحت پنجاب ڈاکٹر احمد جاوید قاضی اور چائنیز وفد کے درمیان سائنوویک ویکسین کی تیاری کے حوالہ سے تبادلہ خیال ہوا اور چائینیز وفد نے پنجاب کے ٹیچنگ سرکاری ہسپتالوں میں مریضوں کیلئے آسانیاں پیدا کرنے پر سیکرٹری صحت ڈاکٹر احمد جاوید قاضی کو سراہا جبکہ چائینیز وفد نے سیکرٹری صحت پنجاب ڈاکٹراحمد جاوید قاضی کو مکمل بریفنگ بھی دی۔

اس موقع پر سیکرٹری صحت پنجاب ڈاکٹر احمد جاوید قاضی نے کہا کہ محکمہ صحت پنجاب کی جانب سے چائنیز وفد کو خوش آمدید کہتے ہیں جبکہ چین کی جانب سے پنجاب میں صحت کے شعبہ میں تعاون لائق تحسین ہے۔

ڈاکٹر احمد جاوید قاضی نے کہا کہ محکمہ صحت پنجاب عوام کوصحت کی بہتر سہولیات فراہم کرنے میں چینی حکومت کا مکمل ساتھ دے گا جبکہ تمام صوبوں میں سے پنجاب نے سب سے زیادہ آبادی کو کورونا کے خلاف ویکسینیٹ کیا ہے۔

سیکرٹری صحت پنجاب ڈاکٹر احمد جاوید قاضی نے مزید کہا کہ انسٹی ٹیوٹ آف بلڈٹرنفیوژن کے ڈاکٹرمحمد اطہر بلڈبنکس کے قیام کے حوالہ سے فوکل پرسن ہوں گے۔

اس موقع پر چائنیز وفد نے اظہار خیال کرتے ہوئے کہا کہ پنجاب کے ٹیچنگ سرکاری ہسپتالوں میں مریضوں کو سہولت دینے پر حکومت پنجاب کی خدمات کو سراہتے ہیں۔

چائنیز وفد نے مزید کہا کہ پنجاب کی عوام کو صحت کی بہتر سہولیات فراہم کرنے میں محکمہ صحت کے ساتھ تعاون جاری رہے گا۔

        ملاقات میں وفد میں پراجیکٹ اسسٹنت یان، ٹیکنیکل کنسلٹنٹ سم سی گئی، ٹیکنیکل مینیجر یان ہاؤ، جنرل مینیجر لوفنگ،پراجیکٹ اسسٹنٹ لی زیوانگ اور چیف سٹریٹجی خرم شہزاد شامل تھے۔

اس موقع پر ایڈیشنل سیکرٹریز حافظ ڈاکٹر شاہد لطیف اور آغا نبیل، ڈپٹی سیکرٹری آپریشنز سید بختیار، انسٹی ٹیوٹ آف بلڈٹرانفیوژن سے ڈاکٹرمحمد اطہر سمیت دیگر فسران بھی موجود تھے۔