وفاقی وزیر برائے توانائی انجینئر خرم دستگیر خان نے کہا ہے کہ موجودہ حکومت ماحول دوست اور سستی بجلی کی پیداوار پر توجہ دے رہی ہے۔

تفصیلات کے مطقب وفاقی وزیر برائے توانائی انجینئر خرم دستگیر خان نے 500 کے وی سکی کناری ٹرانسمیشن لائن کا سنگ بنیاد رکھنے کی تقریب سے خطاب کرتے ہوئے کہا کہ ملک میں خاص طور پر ہزارہ کے علاقے میں سستی بجلی پیدا کرنے کے لیے ترقیاتی منصوبوں پر کام کو تیز کرنے کے لیے تمام تر کوششیں کی جا رہی ہیں۔

انہوں نے کہا کہ ملک کی ترقی موجودہ حکومت کا واحد مشن ہ جبکہ سوکی کناری پروجیکٹ ٹرانسمیشن لائن سستی اور وافر بجلی کی فراہمی کے منصوبوں کا حصہ ہے۔

انہوں نے کہا کہ حکومت مستقبل قریب میں بجلی کے نرخ کم کرنے جا رہی ہے۔

پراجیکٹ کے حوالے سے بات کرتے ہوئے انہوں نے بتایا کہ 75کلو میٹر طویل 500 کے وی ٹرانسمیشن لائن 18704ملین روپے کی لاگت سے تعمیرکی جارہی ہے جبکہ ٹرانسمیشن لائن کے ذریعے 884 میگاواٹ سکی کناری ہائیڈرو پاور پراجیکٹ سے بجلی کی پیداوارکوقومی گرڈ میں شامل کرے گی۔

ان کا کہنا تھا کہ سکی کناری ہائیڈرو پاور پراجیکٹ سی پیک کے تحت 2017میں2100ملین ڈالرکی خطیر رقم سے شروع کیا گیا ہے اور یہ منصوبہ سالانہ تقریباً 3.129 بلین یونٹ بجلی پیدا کرے گا۔

اس منصوبے سے 6000 سے زائد افراد کو روزگار ملا ،پاور پلانٹ نومبر 2024 میں بجلی کی پیداوار شروع کرے گا اور سکی کناری ہائیڈرو پاور پراجیکٹ سے پیدا ہونے والی سستی بجلی سے گھریلو، زرعی اور صنعتی صارفین مستفید ہونگے۔

موجودہ سیاسی حالات پر بات کرتے ہوئے وفاقی وزیر کا کہنا تھا کہ سیاست میں بہت تنقید اور الزام لگتے ہیں لیکن 4 سال والے دیا بجھاتے گئے اور ہم جلانے آئے ہیں۔