صدر مملکت ڈاکٹر عارف علوی نے پاکستان اور سربیا کے مابین دو طرفہ تجارتی حجم میں خاطر خواہ اضافہ کرنے کی ضرورت پر زور دیا ہے۔

تفصیلات کے مطابق صدر عارف علوی سے سربیا میں پاکستان کے نامزد سفیر علی حیدر الطاف کی ملاقات ہوئی جس میں پاکستان اور سربیا کے مابین دو طرفہ تجارتی حجم میں خاطر خواہ اضافہ کرنے کی ضرورت پر زور دیا گیا۔

‘دونوں ممالک کے درمیان تجارتی سرگرمیوں کو فروغ دینے کی ضرورت ہے’

عارف علوی نے کہا کہ دونوں ممالک کے درمیان تجارتی سرگرمیوں کو فروغ دینے کی ضرورت ہے ، پاکستان اور سربیا کے مابین تجارتی اور اقتصادی تعاون کے امکانات سے مکمل طور پر فائدہ حاصل کیا جانا چاہیے۔

انہوں نے کہا کہ نامزد سفیر کاروباری و تجارتی روابط قائم کرنے ، دونوں ممالک کے چیمبرز  آف کامرس کے درمیان تعاون بڑھانے کی کوشش کریں اور دونوں ممالک کے درمیان دوطرفہ دوروں کی تعداد بڑھانے کے لیے کام کریں۔

‘پاکستان میں سرمایہ کاری کیلئے سازگار ماحول ہے’

صدر مملکت نے کہا کہ اعلیٰ و تکنیکی تعلیم ، آئی ٹی اور ثقافت سمیت مختلف شعبوں میں تعاون کی نئی راہیں تلاش کرنی چاہیے، پاکستان میں سرمایہ کاری کے لیے سازگار ماحول ہے۔

انکا کہنا ہے کہ پاکستان اور سربیا کے درمیان صنعت و تجارت ، قابل تجدید توانائی سمیت مختلف شعبوں میں تعاون کے کثیر مواقع موجود ہیں۔

ڈاکٹر عارف علوی نے مزید کہا کہ اسلام آباد میں سربیا کا مشن کھلنے سے کاروبار اور عوامی روابط میں آسانی ہوگی۔

اس موقع پر صدر مملکت نے علی حیدر الطاف کو سربیا میں پاکستان کے نامزد سفیر کے طور پر تقرری پر مبارکباد دیتے ہوئے کہا کہ امید ہے کہ نامزد سفیر دونوں ممالک کے درمیان تعلقات مزید بہتر بنانے کیلئے پاکستانی مشن کی کوششوں کو مزید تیز کریں گے۔