چمن: پاک افغان بارڈر باب دوستی تجارتی سرگرمیوں اور پیدل آمدورفت کے لیے آج دوسرے روز بھی بند ہے۔

  ذرائع کے مطابق پاک افغان بارڈر پر چمن باب دوستی بند کردیا گیا ہے۔ گزشتہ روز افغانستان سے آنے والے مسلح شخص نے پاکستانی اہلکاروں پر اچانک فائرنگ کی جس کے نتیجے میں ایف سی اہلکار رحمت اللہ شہید اور 2 زخمی ہوئے۔

 سیکیورٹی ذرائع نے بتایا کہ واقعے کے بعد دونوں جانب سے فائرنگ شروع ہوگئی اور یہ سلسلہ ایک گھنٹہ تک جاری رہا۔

ذرائع کا کہنا ہے کہ افغان حکومت کا اس معاملے پر کوئی موقف سامنے نہیں آیا تاہم اطلاع ہے کہ 7 زخمی اسپین بولدک افغانستان شفٹ کیے گئے ہیں۔

مزید پڑھیں؛ صوبائی حکومت کے احکامات پر پاک افغان بارڈر پر اہلکار تعینات

فائرنگ کے بعد ڈی سی چمن کی طرف سے پیدل آمدورفت اور تجارت دونوں کیلئے بارڈر گیٹ بند کرنے کا حکم دیا گیا تھا، مبینہ حملہ آور کی حوالگی کا مطالبہ کیا جارہا ہے، جب تک حملہ آور حوالے نہیں کیا جاتا بارڈر مکمل بند رہے گا۔

واضح رہے کہ باب دوستی اور ویش پر صورتحال سخت کشیدہ ہے، دو طرفہ تجارت، مزدوری، رشتہ داریاں اور علاج معالجے کیلئے باب چمن پاک افغان بارڈر سے 15 سے 20 ہزار افراد کا روزانہ سرحد کے دونوں اطراف آمدورفت ہوتا ہے جبکہ گزشتہ سال اگست سے افغانستان میں رجیم چینج سے اب تک بارہ مرتبہ بارڈر پر مسائل ہوئے۔