سابق وزیراعظم اور پاکستان مسلم لیگ (ن) کے سینئر رہنما شاہد خاقان عباسی نے کہا ہے کہ احتساب کے نظام کو تبدیل کرنا ہوگا جس کے لئے تمام سیاسی جماعتوں کو ساتھ مل کر بیٹھنا پرے گا۔

تفصیلات کے مطابق کراچی میں شاہد خاقان عباسی نے میڈیا سے گفتگو کرتے ہوئے کہا کہ آرمی چیف کی تعیناتی پر اثر انداز ہونے کے لئے مارچ کیا جارہا تھا لیکن وہ معاملہ بھی خوش اسلوب سے مکمل ہوگیا۔

انہوں نے کہا کہ ملک میں احتساب پر جلسوں میں بات ہوتی ہے اور یہی نظام ملک کو تباہ کرتے ہیں، سرکاری افسران پر مقدمات بنائیں گے تو کوئی افسر کام کرنے کو تیار نہیں ہوگا اور کوئی بھی نیب کے نام نہاد احتساب سے محفوظ نہیں ہوگا۔

انہوں نے بتایا کہ سابق چیئرمین نیب کے دور کا کوئی بھی کیس مکمل نہیں ہوسکا ہے تاہم ضرورت ہے کہ نیب کے ادارے کو ختم کرکے نیا نظام بنایا جائے۔

شاہد خاقان عباسی کا کہنا تھا کہ عمران خان ایک ماہ سے سفر میں ہیں لیکن  ابھی تک وہ اسلام آباد نہیں پہنچ سکے ہیں تاہم عمران خان قانون کے اندر رہے تو ہم استقبال کریں گے ورنہ رانا ثنا اللہ استقبال کریں گے۔

خیال رہے کہ اس سے قبل پی ایس او میں غیر قانونی بھرتیوں کے ریفرنس پر سماعت کے لئے شاہد خاقان عباسی اور دیگر ملزمان عدالت میں پیش ہوئے۔

سماعت کے دوران ملزم کے وکیل نے بتایا کہ نیب ترمیم سے متعلق سپریم کورٹ میں درخواست زیر سماعت ہے اور نیب ترمیم سے متعلق سپریم کورٹ میں درخواست زیر سماعت ہے۔

بعدازاں عدالت نے ریفرنس کی سماعت بغیر کسی کارروائی 24 دسمبر تک ملتوی کردی ۔

واضح رہے کہ سابق ایم ڈی پی ایس او عمران الحق نے نیب آرڈننس کے تحت درخواست دائر کی ہوئی ہے  جبکہ سابق سیکریٹری پیٹرولیم ارشد مرزا نے ریفرنس میں بریت کی درخواست دائر کر رکھی ہے تاہم دونوں درخواستوں پر آئندہ سماعت پر دلائل دیئے جائیں گے۔