فیاض الحسن چوہان نے کہا ہےکہ لندن میں کھڑا ہو کر کوئی شخص جھوٹ نہیں بول سکتا۔

تفصیلات کے مطابق ترجمان وزیراعلیٰ پنجاب فیاض الحسن چوہان نے پنجاب اسمبلی کے باہر میڈیا سے گفتگو کرتے ہوئے کہا کہ کل تسنیم حیدر شاہ کے نام کا ایک کردار سامنے آیا ہے جس کا ارشد شریف قتل کیس اور عمران خان پر حملہ کیس سے تعلق ہے۔

فیاض الحسن چوہان کا کہنا تھا کہ تسنیم حیدر جو باتیں سامنے لائے ہیں وہ انوکھی اور نئی نہیں ہیں۔

ان کا یہ بھی کہنا تھا کہ سانحہ ماڈل ٹاؤن ، چوہدری شیر علی کا بیان ، رانا ثناءاللہ کا بیان اور عابد باکسر کے بیان سب کے سامنے ہیں۔ سوشل میڈیا یا پر جھوٹا پروپیگینڈا کیا جا رہا ہے کہ تسنیم حیدر کا ن لیگ سے کوئی تعلق نہیں۔

ترجمان وزیراعلیٰ پنجاب نے کہا کہ لندن میں کھڑا ہو کر کوئی شخص جھوٹ نہیں بول سکتا ، وہاں رول آف لا ہے اور بہترین عدالتی نظام ہے۔

انہوں نے یہ بھی کہا کہ اگر لندن میں کھڑے ہو کر کسی شخص نے نواز شریف اور ان کے خاندان کے حوالے سے دعویٰ کیا ہے تو وہ جھوٹ نہیں ہے کیونکہ تسنیم حیدر جانتا ہے کہ لندن کا عدالتی نظام اسے نشان عبرت بنا دے گا۔

ان کا کہنا تھا کہ نہال ہاشمی نے ججز کو دھمکیاں دیں مگر وہ بے آبرو ہوا، نہال ہاشمی کو انہیں فلیٹس کے اندر نواز شریف نے ہاتھ کے اشارے سے دھتکار دیا تھا۔نہال ہاشمی جیسے شخص کو اجازت نہیں ملتی کہ وہ ان فلیٹوں میں جا سکے۔

 ترجمان وزیراعلیٰ پنجاب نے کہا کہ اگر تسنیم حیدر جیسا بندہ ان فلیٹوں کے اندر جا کر بیٹھتا ہے تو کیا اس کو نواز شریف اور اس کے لوگ نہیں جانتے ہوں گے۔

ان کا کہنا تھا کہ تسنیم حیدر کے انکشافات کے بعد عوام سمجھ رہی ہے کہ عمران خان پر حملے کی ایف آئی آر کیوں نہیں کاٹی جا رہی، پنجاب حکومت کو تسنیم حیدر سے رابطہ کر کے شامل تفتیش کرنا چاہیے۔

فیاض الحسن چوہان کا کہنا تھا کہ نواز شریف کے خاندان سے کسی بھی انتقامی کارروائی کی توقع کی جا سکتی ہے، میں عدلیہ سے مطالبہ کرتا ہوں کہ اس حوالے سے مکمل تحقیقات ہونی چاہئیں۔

ترجمان وزیراعلیٰ پنجاب نے کہا کہ شہباز شریف کے پاس اس وقت کوئی اختیار نہیں رہا وہ اس وقت ایک کٹھ پتلی بنے ہوئے ہیں اور نواز شریف کا لندن میں رہنا بھی اب محال ہو جائے گا۔

انہوں نے یہ بھی کہا کہ پاکستان پچھہتر فیصد دیوالیہ ہونے کے قریب ہے، زر مبادلہ کے ذخائر کم ہو رہے ہیں اور ایکسپورٹس تباہ ہو چکی ہیں۔

فیاض الحسن چوہان کا کہنا تھا کہ جعلی نجات دہندہ اسحاق ڈار بھی کچھ نہیں کر سکا، وہ بس صدر مملکت کو دھمکیاں لگانے کے لیے استعمال ہو رہا ہے، بلاول زرداری اپنی اوقات کے مطابق بات کریں صدر کو دھمکیاں لگانے سے باز آئے۔

لانگ مارچ کے حوالے سے بات کرتے ہوئے ترجمان وزیراعلیٰ پنجاب فیاض الحسن چوہان نے مزید کہا کہ عمران خان کا لانگ مارچ چھبیس تاریخ کو روالپنڈی سے پوری آب وتاب  کے ساتھ اسلام آباد جائے گا، لانگ مارچ کا راولپنڈی میں تاریخی استقبال ہوگا۔