پنجاب میں بریسٹ کینسر کی مریض خواتین کا مفت علاج کرنے کا فیصلہ کیا گیا ہے۔

وزیراعلیٰ پنجاب چوہدری پرویز الہیٰ سے روش (Roche) پاکستان لمیٹڈ کی مینجنگ ڈائریکٹر حفصہ شمسی کی قیادت میں وفد کی ملاقات ہوئی جس میں بریسٹ کینسر سے متعلق بریفنگ دی گئی۔

وزیراعلیٰ پنجاب کو بریفنگ

ملاقات میں وزیراعلیٰ پنجاب کو بریفنگ دی گئی کہ پاکستان میں بریسٹ کینسر کی شرح سب سے زیادہ ہے، 8 سے 10 ہزار خواتین کینسر میں مبتلا پائی جاتی ہے۔

وزیراعلیٰ چوہدری پرویز الہیٰ نے پراجیکٹ کی منظوری دیتے ہوئے کہا کہ پنجاب میں بریسٹ کینسر کی مریض خواتین کا مفت علاج ہوگا اور روش کمپنی کینسر کی مریض خواتین کے مفت علاج میں معاونت کریگی۔

پرویز الہیٰ نے کہا کہ بڑے اسپتالوں میں بریسٹ کینسر کے علاج کیلئے سینٹر آف ایکسی لینس قائم کیے جائیں گے اور سرکاری اسپتالوں میں بریسٹ کینسر سے بچاؤ اور تشخیص کیلئے خصوصی کاؤنٹرز قائم کیے جائیں گے۔

‘کسی بھی اسٹیج پر کینسر تشخیص ہونے پر مریض کا مفت علاج ہوگا’

وزیراعلیٰ پنجاب نے کہا کہ نجی شعبے کے اشتراک سے 37ہزار لیڈی ہیلتھ ورکرز کو ٹریننگ دی جارہی ہے۔ خواتین میں کینسر کی تشخیص کیلئے لیڈی ہیلتھ ورکرز بھرپور کردار ادا کرسکتی ہیں۔

انہوں نے مزید کہا کہ کسی بھی اسٹیج پر کینسر تشخیص ہونے پر مریض کا مفت علاج ہوگا اور پھیپھڑوں کے کینسر میں مبتلا مریضوں کو بھی علاج کی بہترین سہولتیں فراہم کریں گے۔

وزیراعلیٰ پنجاب کی روش کمپنی کو پنجاب میں پروڈکشن پلانٹ لگانے کی دعوت

وزیراعلیٰ چوہدری پرویز الہیٰ نے روش کمپنی کو پنجاب میں پروڈکشن پلانٹ لگانے کی دعوت دیتے ہوئے کہا کہ 10 سال کیلئے ٹیکس فری زون قائداعظم بزنس پارک میں پلانٹ لگائیں۔

پرویز الہیٰ نے مزید کہا کہ روشن کمپنی پنجاب میں پروڈکشن شروع کرے اور ہر ممکن تعاون کریں گے۔

اس موقع پر مینجنگ ڈائریکٹر روش حفصہ شمسی نے کہا کہ پنجاب کے ہیلتھ کیئر سسٹم میں مثبت تبدیلی دیکھنے کو آرہی ہے۔

حفصہ شمسی نے مزید کہا کہ چوہدری پرویز الہیٰ کا پنجاب میں عوام کو علاج معالجے کی بہترین سہولتیں فراہم کرنے کا مشن قابل تحسین ہے۔

ملاقات میں وزیراعلیٰ کے مشیر عامرسعید راں، روش کے ڈائریکٹر فنانس فرحان بھٹی، افتخار حسین، سیکرٹری اسپیشلائزڈ ہیلتھ کیئر اینڈ میڈیکل ایجوکیشن احمد جاوید قاضی، کینسر کے اسپیشلسٹ پروفیسر عباس کھوکھر اور کوثر بانو اور دیگر متعلقہ حکام بھی موجود تھے۔