وزیرآباد میں لانگ مارچ کے دوران چیئرمین پی ٹی آئی عمران خان  پر قاتلانہ حملہ کرنے والے ملزم کو پولیس نے گرفتار کرلیا ہے۔

گرفتاری کے بعد ملزم نوید کا اعترافی بیان بھی منظر عام پر آیا تھا جس میں اس نے عمران خان پر قاتلانہ حملہ کرنے کی ذمہ داری قبول کی تھی۔

بعداز ملزم نوید کون ہے اور کیا کرتا ہے اس حوالے سے بھی اہم معلومات سامنے آگئیں ہیں جس کے مطابق ملزم پیشے سے پلمبر تھا۔

پولیس نے کارروائی کرتے ہوئے نوید کے اہل خانہ اور بھائیوں کو بھی حراست میں لے لیا ہے جبکہ اس کے 2 کم سن بیٹے بھی ہیں۔

ملزم نوید کے متعلق اہل محلہ کا کہنا ہے کہ وہ خاموش طعبیعت کا مالک تھا  اور وہ محلے میں کم ہی اٹھتا بیٹھتا تھا۔

ملزم نوید کا اعترافی بیان:

چیئرمین پی ٹی آئی عمران خان پر حملہ کرنے والے ملزم نے پولیس کو دیے گئے ویڈیو بیان میں کہا کہ اس نے عمران خان کو مارنے کی کوشش اس لیے کی کیوں کہ اس کے مطابق عمران خان لوگوں کو گمراہ کر رہے ہیں۔

حملہ آور کا کہنا تھا کہ وہ صرف عمران خان کو مارنا چاہتا تھا، اس کے پیچھے کوئی نہیں ہے اور نہ ہی کوئی اس کے ساتھ ہے ، اس نے اکیلے ہی یہ کام کیا ہے۔

ملزم کا مزید کہنا تھا کہ عمران خان پر حملہ اس لیے کیا کہ اذانیں ہو رہی تھیں اور ڈیک لگائے ہوئے تھے، شورکر رہے تھے، میرے ضمیر نے گوارا نہیں کیا۔

حملہ آور نے مزید بتایا کہ جس دن سے لانگ مارچ لاہور سے چلا اس دن سے اس نے حملہ کرنے کا سوچ لیا تھا۔

عمران خان پر قاتلانہ حملہ

گوجرانوالہ میں لانگ مارچ کے دوران چیئرمین پی ٹی آئی عمران خان قاتلانہ حملے میں گولی لگنے سے زخمی ہوگئے ہیں تاہم ان کی حالت خطرے سے باہر ہے اور اب شوکت خانم میں انہیں طبی امداد دی جارہی ہے۔

ذرائع نے بتایا کہ عمران خان کا آزادی مارچ ایک سڑک سے گزر رہا تھا کہ اس دوران گلی سے ایک شخص نکلا اور کنٹینر کے قریب آکر فائرنگ کردی۔

حملہ آور کو دیکھ کو پی ٹی آئی کارکن نے پستول ہر ہاتھ مارا جس سے اس کا رخ بدل گیا اور کئی لوگ جسم کے نچلے حصوں پر گولیاں لگنے سے زخمی ہوئے۔