شہر کراچی میں کباڑی مارکیٹ میں لگنے والی آگ بےقابو ہوگئی ہے جبکہ فائر بریگیڈ کی 9 گاڑیاں آگ بجھانے میں مصروف ہیں۔

تفصیلات کے مطابق کراچی کے علاقے شیر شاہ کی کباڑی مارکیٹ میں آگ لگنے کا واقعہ پیش آیا جس پر تاحال قابو نہیں کیا جاسکا ہے۔

اس حوالے سے فائر بریگیڈ  حکام کا کہنا ہے کہ فائر بریگیڈ کی 9 نو گاڑیاں آگ بجھانے میں مصروف ہیں تاہم تنگ گلیوں کی وجہ سے فائر بریگیڈ کی گاڑیاں کو آگ بجھانے میں مشکلات کا سامنا ہے اور دوکاندار بھی اپنی مدد آپ کے تحت قیمتئ سامان بچانے کی کوششیں کررہے ہیں۔

انہوں نے بتایا کہ آگ گاڑیوں کے پرانے اسپئر پارٹس کی دکانوں میں لگی ہے جس کی بنیادی وجوہات معلوم کررنے کی کوشش کررہے ہیں۔

ان کا کہنا تھا کہ آگ بجھنے کے بعد ہونے والے نقصانات کا تخمینہ لگایا جائے گا تاہم ریسکیو آپریشن کے دوران محمد اکرم نامی فاٸر فاٸیٹر ریوار گرنے کے باعث زخمی ہوا ہے، حالت خطرے سے باہر ہے۔

خیال رہے کہ اس واقعے میں تاحال کوئی جانی نقصان ہونے کی اطلاعات موصول نہیں ہوئیں ہیں۔

ہائیڈرنٹس پر ایمرجنسی نافذ:

شیر شاہ کباڑی مارکٹ میں آگ بے قابو ہونے کے بعد واٹر بورڈ کے کریش اور سخی حسن ہائیڈرنٹس پر ایمرجنسی نافذ کردی گئی ہے۔

سی ای او واٹر بورڈ نے کہا ہے کہ پانی سے بھرے متعدد ٹینکرز حادثہ کے مقام کی جانب روانہ کردیئے گئے ہیں جبکہ انچارج ہائیڈرنٹس سیل فائر بریگیڈ حکام سے مکمل رابطے میں ہے اور انچارج ہائیڈرنٹس سیل فائر بریگیڈ حکام سے مکمل رابطے میں ہے۔

انہوں نے بتایا ہے کہ آگ پر مکمل قابو پائے جانے تک فائر بریگیڈ کو بلامعاوضہ پانی کی فراہمی جاری رہے گی۔

فائر بریگیڈ حکام غلط بیانی کر رہے ہیں، کباڑی مارکیٹ کے یونین صدر

کباڑی مارکیٹ کے یونین صدر ملک زاہد نے میڈیا سے گفتگو کرتے ہوئے کہا کہ صبح سویرے آنے والی فائر بریگیڈ کی دو گاڑیوں کے عملے کی غفلت سے آگ پھیلی، اگر فائر بریگیڈ بروقت درست طریقے سے آگ بجھاتے تو آگ اتنی نہ پھیلتی۔

انہوں نے کہا کہفائر بریگیڈ حکام غلط بیانی کر رہے ہیں، آتشزدگی کے نتیجے میں 60 سے 70 دکانیں جلی ہیں اور آگ نے ایک گلی سے دوسری گلی کی دکانوں کو بھی لپیٹ میں لے لیا ہے۔

انہوں نے بتایا کہ فائر بریگیڈ کے عملے میں اکثر عمر رسیدہ رضاکار ہیں،آگ بجھانا انکے بس کی بات نہیں تاہم فائر بریگیڈ میں جوانوں کو بھرتی کیا جائے۔