احتساب عدالت نے آمدن سے زیادہ اثاثے بنانے کے ریفرنس میں شریک ملزم گلزار کو بیرون ملک سفر کرنے کی اجازت دے دی۔

تفصیلات کے مطابق آمدن سے زیادہ اثاثے بنانے کے ریفرنس میں پاکستان پیپلز پارٹی (پی پی پی) کے رہنما اور سندھ اسمبلی کے اسپیکر آغا سراج درانی احتساب عدالت کراچی میں پیش ہوئے۔

ریفرنس میں شریک ملزم گلزار نے بیرون ملک سفر کی اجازت کی درخواست دائر کی۔

ملزم کے وکیل جاوید الطاف نے دلائل دیتے ہوئے کہا کہ ٹی ڈیپ نے جنوبی افریقہ میں ہونے والی نمائش میں پاکستان کی نمائندگی کرنے کی دعوت دی ہے۔

وکیل ملزم نے مزید کہا کہ عدالت سے استدعا ہے کہ ملزم کو باہر جانے کی اجازت دی جائے۔

عدالت نے ملزم کو بیرون ملک سفر کی اجازت دیتے ہوئے ملزم کو 5 لاکھ روپے زر ضمانت جمع کرانے کا حکم دیا۔

احتساب عدالت نے ملزم کو 8 دسمبر تک وطن واپس آنے کا حکم دیتے ہوئے ریفرنس کی مزید سماعت 9 دسمبر تک ملتوی کردی۔

آغا سراج کی صحافیوں سے گفتگو

اسپیکر سندھ اسمبلی آغا سراج نے صحافیوں سے غیر رسمی گفتگو کرتے ہوئے کہا کہ میں واحد سیاسی کارکن ہوں جو ابھی تک کیس کا سامنا کر رہا ہوں۔

انہوں نے کہا کہ چار سال ہوگئے عدالتوں کے چکر لگا رہا ہوں، ہر پیشی پر آتا ہوں تاریخ ملتی ہے پھر چلا جاتا ہوں۔

آغا سراج درانی نے کہا کہ کبھی جج صاحب نہیں ہوتے کبھی کوئی اور مسئلہ ہوتا ہے، گیارہ ماہ سے عدالت میں جج نہیں ہے۔

سندھ اسمبلی کے اسپیکر نے مزید کہا کہ آرمی چیف کی تعیناتی آئین کے مطابق ہو رہی ہے، جو وفاق میں ہیں وہ بات کر رہے ہیں ہم تو سندھ میں ہوتے ہیں۔