اسلام آباد: متنازع ٹوئٹس کے معاملے پر سینیٹر اعظم سواتی کے جسمانی ریمانڈ سے متعلق فیصلہ محفوظ کرلیا گیا ہے۔

تفصیلات کے مطابق متنازع ٹوئٹس کے معاملے پر اعظم سواتی کو ڈیوٹی جج وقاص احمد راجہ کی عدالت میں پیش کیا گیا۔ اعظم سواتی کی جانب سے بابر اعوان عدالت میں پیش ہوئے۔

تفتیشی افسر ایف آئی اے نے عدالت میں اپنا موقف بیان کرتے ہوئے کہا کہ اعظم سواتی نے مختلف ٹوئٹس کی ہیں اور ٹوئٹ اوکاونٹ اعظم سواتی کا ہے، قانون سے کوئی بالاتر نہیں ہے، یہ ایک بیانیہ بن رہے ہیں، ان کے خلاف پہلے بھی مقدمہ درج ہے۔

دوسری جانب اعظم سواتی کے وکیل بابر اعوان نے عدالت کو بتایا کہ جو ٹوئٹس کیے گئے وہ ایف آئی آر میں لگائی گئی دفعات پر پورا نہیں اترتے، پولیس کی جانب سے لیے گئے بیان کی کوئی قانونی حیثیت نہیں۔

بابر اعوان نے کہا کہ اعظم سواتی کا 164 کا بیان نہیں لیا گیا، سینیٹر اعظم سواتی پر پچھلی بار بیہیمانہ تشدد کیا گیا تھا اور یہ اب بھی اس تشدد سے ریکور نہیں کر سکے ہیں۔

وکیل کا کہنا ہے کہ اعظم سواتی پر جسمانی اور دماغی تشدد کے اثرات برقرار ہیں، ان کو جسمانی طور پر بھی تشدد کا نشانہ بنایا گیا اور ویڈیو کے ذریعے دماغی ٹارچر بھی کیا گیا۔

بابر اعوان نے اپنے موقف میں کہا کہ یہ قانون کی حکمرانی کی بات کرتے ہیں، آٹا اسمگلنگ روک نہیں سکتے، یہ قانون کی حکمرانی نہیں، قانون کا مذاق اور قانون کا قتل ہےؕ

انہوں نے عدالت میں کہا کہ زندگی کا سب سے بڑا محافظ موت کا وقت ہے جو اللہ کی قدرت میں ہے، ہم موت سے نہیں ڈرتے، اعظم سواتی کی جان کو بھی خطرہ ہے، جان تو سب سے پیاری چیز ہے، اللہ قرآن میں بھی کہتا ہے۔

وکیل نے مزید کہا کہ یہ بیان دیں کہ اگر ان کی کسٹڈی میں اعظم سواتی کو کچھ ہوتا ہے تو یہ ذمہ دار ہوں گے۔ یہاں جو ایف آئی اے کے لوگ موجود ہیں ان کا نام آرڈر شیٹ میں ڈالا جائے۔

عدالت میں اعظم سواتی نے اسسٹنٹ ڈائریکٹر ایاز کا نام آرڈر شیٹ میں ڈالنے کا اسرار کیا۔ اس پر ڈیوٹی جج نے کہا کہ میں صرف ان کا نام ڈالوں گا جو لوگ یہاں موجود ہیں۔

اسلام آباد کی مقامی عدالت نے سینیٹر اعظم خان سواتی کو 2 روزہ جسمانی ریمانڈ پر ایف آئی سے کے حوالے کردیا۔