وزارت داخلہ کی جانب سے سابق وفاقی وزیر اور پی ٹی آئی کے سینئر رہنما اسد عمر کو ممکنہ خطرات سے آگاہ کردیا گیا ہے۔

تفصیلات کے مطابق وزارت داخلہ کی جانب سے سیکرٹری جنرل پاکستان تحریک انصاف اسد عمر کو بھی مراسلہ ارسال  کردیا گیا ہے۔

مراسلے میں ملک میں حالیہ دہشتگردی کے واقعات کا حوالہ دیا گیا ہے اور بتایا گیا ہے کہ انتہا پسند جماعتیں پی ٹی آئی کے لانگ مارچ پر دہشتگردی کا حملہ کر سکتی ہیں۔

خط کے مطابق حملے میں بیرونی عناصر کی جانب سے بھی کارروائی کا اندیشہ ہے جس میں عوامی اجتماعات کو دہشتگردی کا نشانہ بنایا جا سکتا ہے۔

خط میں آگاہ کیا گیا ہے کہ عوامی اجتماعات میں خودکش یا بم حملہ بھی ہونے کا امکان ہے تاہم پاکستان تحریک انصاف راولپنڈی میں عوامی اجتماع کو موخر کرے۔

خیال رہے کہ پاکستان تحریک انصاف کی جانب سے 26 نومبر سے فیض آباد کے مقام پر دھرنا دینے کا اعلان کردیا گیا ہے۔

 پاکستان تحریک انصاف کے سینئر رہنما اسد عمر نے میڈیا سے گفتگو کرتے ہوئے کہا ہے کہ جمعہ کی صبح سے فیض آباد میں خیمہ بستی لگا دی جائے گی لیکن 26 نومبر کو عمران خان نے روکنے کا کہا تو کارکنان کو روک لیاجائےگا۔

انہوں نے بتایا کہ خبر آرہی تھی کہ عمران خان کو قتل کرنے کا منصوبہ بنایاجارہا ہے جس کے لئے سیکیورٹی کے لیے سخت انتظامات کیے جارہے ہیں کیونکہ عمران خان چاہتےہیں عوام اور ان کے درمیان کوئی دیوار نہ ہو۔

انہوں نے مزید کہا کہ حکومت عوام کی طرف توجہ دیتی تو معیشت کی تباہی نہ ہوتی لیکن آج معیشت کی تباہی سے عوام کی مشکلات میں اضافہ ہورہاہے اور سیاسی انتشار سے نکلنے کا راستہ صرف انتخابات کا اعلان ہے۔

پاکستان تحریک انصاف کی جانب سے 26 نومبر کو فیض آباد کے مقام پر ایک تاریخی اجتماع کرنے کا اعلان کردیا گیا ہے ۔

اس حوالے سے تحریک انصاف کی جانب سے باضابطہ طور پر اسلام آباد انتظامیہ کو درخواست دے دی گئی جو کہ علی نواز اعوان نے جمع کرائی ہے۔

درخواست میں بتایا گیا ہے کہ تحریک انصاف 26 نومبر کو فیض آباد کے مقام پر عوامی اجتماع کا انعقاد کرے گی جس دوران  چئیرمین تحریک انصاف عمران خان کا ہیلی کاپٹر پریڈ گراؤنڈ اسلام آباد میں لینڈ کرے گا۔