انفارمیشن کمیشن آف پاکستان نے وزارت ریلوے کو شہری کو دس دن کےاندر معلومات دینےکا حکم دے دیا۔

کانٹینٹ سیل بول نیوز اسلام آباد کے مطابق ریلوے میں گذشتہ تین سالوں میں مبینہ کروڑوں روپے کی کنسلٹنسی دیے جانے اور ریلوے کمپنی کے خسارے میں چلنے اور مبینہ میرٹ کے خلاف بھرتیوں کے بعد شہری نے درخواست دی تھی جس پر وزارت ریلوے و ماتحت کمپنی نے معلومات دینے سے انکار کر دیا تھا۔

بعد ازاں شہری نے انفارمیشن کمیشن آف پاکستان کو درخواست دے دی ۔ انفارمیشن کمیشن  نے وزارت ریلوے کو معلومات شہری کو فراہم کرنے کا حکم دے دیا گیا۔

انفارمیشن کمیشن کے خط میں کہا گیا کہ دس روز میں شہری کو معلومات فراہم کی  جائیں۔

درخواست گزار شہری نے ریلوے کے گذشتہ 3سال میں کنسلٹنسی ٹھیکوں کی تفصیل مانگی تھی۔

کنسلٹنسی کے ٹھیکے کن کو دیے گئے اور کتنی رقم خرچ کی گئی؟ کنسلٹنسی سے ریلوے کو کیا فائدہ ہوا؟ ریلوے کمپنی ریل کوپ کا تین سال کا مالیاتی ریکارڈ دیا جائے۔

ریل کاپ میں کل کتنے ملازمین ہیں اور ان کو کتنی تنخواہ دی جارہی ہے ،ریل کاپ کے زیر انتظام ریلوے مرمتی مشینوں کی تعداد کتنی ہے، ریل کاپ کے زیر انتظام ریلوے مرمتی مشینوں سے کتنا کام لیا جا رہا ہے۔

ریلوے کمپنی ریل کاپ نے شہری کو معلومات دینے سے انکار کیا تھا۔ وزارت ریلوے نے کنسلٹنسی کے بارے میں مقررہ وقت میں جواب نہیں دیا۔