وزیراعلیٰ پنجاب چودھری پرویز الٰہی نے کہا ہے کہ سرمایہ کاروں کی انوسٹمنٹ کا تحفظ یقینی بنایا جائے گا۔

تفصیلات کے مطابق وزیراعلیٰ پنجاب چودھری پرویز الٰہی سے سوئٹزر لینڈ کے سفیر جارج سٹینر کی ملاقات ہوئی ہے۔

ملاقات میں باہمی تعلقات اوردوطرفہ تجارت میں اضافے کے حوالے سے تبادلہ خیال کیا گیا، پن بجلی کے منصوبوں، ڈیری فارمنگ، موسمیاتی تبدیلیوں اور سیاحت کے شعبوں میں تعاون بڑھانے پر بھی اتفاق کیا گیا جبکہ سوئس سفیر نے پن بجلی کے منصوبوں میں پنجاب حکومت کو معاونت فراہم کرنے کی یقین دہانی بھی کروائی۔

اس موقع پر وزیراعلیٰ پنجاب چودھری پرویز الٰہی نے کہا کہ پنجاب حکومت نے دریائے چناب پر ہائیڈل پراجیکٹس بنانے کا منصوبہ بنایا ہے جبکہ ہائیڈل پراجیکٹس سے سیلاب سے ہونے والی تباہی سے بچا جا سکے گا اور ان پراجیکٹس کی تعمیر سے زرعی مقاصد کے لئے پانی ذخیرہ کیا جا سکے گا۔

انہوں نے کہا کہ ہائیڈل پراجیکٹس کی تعمیر میں سوئٹزرلینڈ کی کمپنیوں کے تعاون کا خیرمقدم کریں گے۔

ان کا کہنا تھا کہ موسمیاتی تبدیلیوں سے پاکستان سب سے زیادہ متاثر ہوا ہے جبکہ موسمیاتی تبدیلیوں سے نبرد آزما ہونے کے لئے بین الاقوامی سطح پر مربوط اقدامات کی ضرورت ہے۔

ان کا یہ بھی کہنا تھا کہ پنجاب میں غیر ملکی سرمایہ کاری کے فروغ کے لئے سپیشل اکنامک زونز بنائے گئے ہیں اور سپیشل اکنامک زونز میں سرمایہ کاروں کو ترجیحی بنیادوں پر سہولتیں فراہم کی گئی ہیں۔

چودھری پرویز الٰہی نے کہا کہ ٹیکس کی چھوٹ کے ساتھ تمام یوٹیلٹیز سپیشل اکنامک زونز میں فراہم کی گئی ہیں۔

انہوں نے کہا کہ سرمایہ کاروں کی انوسٹمنٹ کا تحفظ یقینی بنایا جائے گا جبکہ پنجاب حکومت نے کارپوریٹ فارمنگ پالیسی کو حتمی شکل دے دی ہے اور سوئس کمپنیاں کارپوریٹ فارمنگ پالیسی کے تحت سرمایہ کاروں کے لئے خصوصی اقدامات سے فائدہ اٹھا سکتی ہیں۔

  وزیراعلیٰ پنجاب چودھری پرویز الٰہی نے مزید کہا کہ سیاسی منظرنامے پر اتار چڑھاؤ آتے رہتے ہیں لیکن سرمایہ کاروں کے لئے پالیسیوں میں یکسانیت رہتی ہے۔

اس موقع پر سوئٹزر لینڈ کے سفیر جارج سٹینر نے وزیراعلیٰ چودھری پرویزالٰہی کو سوئٹزرلینڈ کے دورے کی دعوت دیتے ہوئے کہا کہ پنجاب ایک اہم صوبہ ہے اورآپ کی قیادت میں آگے بڑھ رہا ہے۔

انہوں نے کہا کہ خوشی ہے کہ پنجاب کی فیکٹریوں میں اعلیٰ معیار کی اشیاء کی پروڈکشن ہو رہی ہے جبکہ کاروباری معاونت بڑھانے کیلئے چودھری پرویز الٰہی کا ویژن قابل تحسین ہے۔

سوئٹزر لینڈ کے سفیر جارج سٹینر نے مزید کہا کہ پنجاب کے ساتھ مختلف شعبوں میں تعاون بڑھانے کے لئے پائیدار اقدامات کریں گے۔

اس موقع پر سینئر پولیٹیکل مشیر اسامہ قیصر خان، سابق وفاقی سیکرٹری و چیئرمین پلاننگ اینڈڈویلپمنٹ بورڈ سلمان غنی، سابق پرنسپل سیکرٹری وزیراعلیٰ جی ایم سکندر، سینئر ممبر بورڈ آف ریونیو، سیکرٹری منصوبہ بندی و ترقیات، چیف ایگزیکٹو آفیسر پنجاب سرمایہ کاری بورڈ اور متعلقہ حکام بھی موجود تھے۔