خیبرپختونخوا کے علاقے لکی مروت میں پولیس وین پر دہشت گردوں کی جانب سے کئے جانے والے حملے میں چھ پولیس اہلکار شہید ہوگئے ہیں۔

اس حوالے سے پولیس ذرائع کا کہنا ہے کہ لکی مروت میں تھانہ ڈاڈیوالہ کی حدود میں دہشتگردوں کی جانب سے پولیس موبائل چوکی عباسہ خٹک کی موبائل گاڑی کو نشانہ بنایا گیا ہے۔

پولیس ذرائع کے مطابق حملہ موبائل پر ہوا ہے جس میں پولیس اہلکار سوار تھے تاہم حملے میں 6 پولیس اہلکاروں کے شہید ہونے کی اطلاعات ہیں۔

پولیس ذرائع کا کہنا ہے کہ شہید ہونے والوں میں انچارج اور ڈرائیور سمیت چھ اہلکار شامل ہیں۔

پولیس کے مطابق دہشتگردوں نے تھانہ ڈاڑے والا کی حدود عباسہ روڈ وانڈہ شہاب خیل پر دہشت گردوں نے پولیس وین پر حملہ کیا تھا۔

ذرائع کا کہنا ہے کہ واقعے کے بعد پولیس کی مزید نفری طلب کرلی گئی ہے۔

وزیراعظم کی پولیس وین پر دہشت گردوں کے حملے کی شدید مذمت:

وزیراعظم شہباز شریف کی جانب سے لکی مروت میں پولیس وین پر دہشت گردوں کے حملے کی شدید مذمت کی گئی ہے جبکہ چھ پولیس شہداء کو خراج عقیدت بھی پیش کیا گیا ہے۔

وزیراعظم نے کہا کہ پولیس نے دہشت گردی کے خلاف ہراول دستے کا قابل فخر کردار ادا کیا ہے، مادر وطن پر جان قربان کرنے والے بیٹوں کو قوم سلام پیش کرتی ہے۔

انہوں نے کہا کہ دہشت گرد پاکستان کے دشمن ہیں، پورا پاکستان دہشت گردی کے خلاف سیسہ پلائی دیوار ثابت ہوگا ۔

 اس موقع پر وزیراعظم نے خیبرپختونخوا حکومت پر شہداء کو اعزازات اور شہداء پیکج دینے پر زور دیا ہے۔

وزیرداخلہ کی لکی مروت میں پولیس وین پر دہشت گردوں کے حملے کی شدید مذمت:

وفاقی وزیرداخلہ رانا ثناءاللہ نے بھی لکی مروت میں پولیس وین پر دہشت گردوں کے حملے کی شدید مذمت کرتے ہوئے واقعے پر تشویش کا اظہار کیا ہے۔

اس موقع پر وزیر داخلہ رانا ثناءاللہ نے واقعے میں شہید ہونے والے پولیس اہلکاروں کو خراج عقیدت پیش کرتے ہوئے چیف سیکرٹری اورائی جی خیبر پختونخواہ سے واقعے کی رپورٹ طلب کرلی ہے۔

انہوں نے پولیس اہلکاروں کی شہادت کے واقعے پر گہرے دکھ اور افسوس کااظہار کرتے ہوئے شہداء کے اہل خانہ سے تعزیت اور ہمدردی کا بھی اظہار بھی کیا ہے۔

وزیر اعلیٰ نے آئی جی پولیس سے واقعے کی رپورٹ طلب کرلی:

لکی مروت میں پولیس موبائل پر فائرنگ کے واقعہ کا نوٹس لیتے ہوئے وزیر اعلیٰ محمود خان نے رپورٹ طلب کرلی ہے۔

وزیر اعلیٰ کا شہید ہونے والوں کی درجات بلندی اور غمزدہ لواحقین سے دلی ہمدردی اور تعزیت کا اظہار کرتے ہوئے کہا ہے کہ واقعہ انتہائی افسوناک ہے، شہداء کی قربانی رائیگاں نہیں جائے گی۔

۔وزیراعلیٰ بلوچستان کی لکی مروت میں پولیس وین پر دہشت گردوں کی فائرنگ کے واقعہ کی مذمت

وزیراعلیٰ بلوچستان میر عبدالقدوس بزنجو نے بھی لکی مروت میں پولیس وین پر دہشت گردوں کی فائرنگ کے واقعہ کی شدید مذمت کرتے ہوئے 6 پولیس اہلکاروں کی شہادت پر دکھ و افسوس کا اظہار کیا ہے۔