بلاول بھٹو نے کہا ہے کہ پاکستان کا دفاع انتہائی مضبوط ہاتھوں میں ہے۔

تفصیلات کے مطابق چیئرمین پیپلز پارٹی اور وزیر خارجہ بلاول بھٹو زرداری نے آئیڈیاز 2022کا افتتاح کیا، نمائش  15 سے 18 نومبر تک کراچی ایکسپو سینٹر میں جاری رہے گی۔

کراچی میں جاری دفاعی نمائش کے پیش نظر سیکورٹی ہائی الرٹ کردی گئی ہے۔

نمائش میں وزیر اعظم شہباز شریف کورونا کے باعث تقریب میں شریک نہ ہوسکے تاہم انہوں اپنے پیغام میں آئیڈیاز 2022کو پاکستان کے دفاعی شعبہ اور اسلحہ سازی کی صنعت کے لئے مثبت عمل اور خوش آئند اقدام قرار دیا ۔

اس موقع پر بلاول بھٹو زرداری نے غیر ملکی وفود اور اعلیٰ فوجی افسران سے ملاقات کی اور مختلف اسٹالز کا دورہ بھی کیا۔

چیئرمین پیپلز پارٹی اور وزیر خارجہ بلاول بھٹو زرداری نے کہا کہ پاکستان کا دفاع انتہائی مضبوط ہاتھوں میں ہے، پاکستان دفاعی ساز و سامان میں انتہائی جدت لایا ہے۔

دفاعی نمائش کے پہلے روز ڈی جی رینجرز سندھ میجر جنرل اظہر وقاص نے جدید ڈرون،بکتر بند گاڑیوں سمیت دیگر دفاعی اسلحہ کے اسٹالز کا دورہ کیا اور اسلحہ کا معائنہ کیا۔

اسٹالز پر موجود عملے نے ڈی جی رینجرز سندھ میجر جنرل اظہر وقاص کو بریفنگ دی، دفاعی نمائش کے دوران ایکسپو سینٹر کے اطراف سیکورٹی پلان کے مطابق 500سے زائد اہلکار تعینات کئے گئے ہیں۔

اس موقع پر کراچی ٹریفک پولیس کی جانب سے روٹ پلان تشکیل دیا گیا ہے جس میںوی وی آئی پی موومنٹ کے باعث ایکسپو سینٹر کے اطراف کی سڑکوں کو عام ٹریفک کے لئے بند کرکے یہاں کے ٹریفک کا رخ متبادل راستوں کی جانب موڑ دیا گیا ہے۔