وفاقی وزیر شازیہ مری نے کہا ہے کہ موسمیاتی تبدیلی سب سے زیادہ کمزور آبادی کو متاثر کرتا ہے۔

تفصیلات کے مطابق وفاقی وزیر برائے تخفیف غربت و سماجی تحفظ شازیہ مری نے اٹلی میں ورلڈ فوڈ پروگرام کے ایگزیکٹو بورڈ کے اجلاس میں شرکت کی جہاں انہوں نے شرکاء سے خطاب کرتے ہوئے کہا کہ بینظیر انکم سپورٹ پروگرام کا سیلاب سے متاثرہ 2.8 ملین خاندانوں کو ریلیف فراہم کرنا قابل تحسین ہے۔

انہوں نے کہا کہ سیلاب متاثرین میں  316 ملین ڈالر کی رقم تقسیم  کی جاچکی ہے، پاکستان کو 2030 تک غذائی تحفظ سے متعلق اہداف کے چیلنج کا سامنا ہے۔

شازیہ مری نے یہ بھی کہا کہ سیلاب متاثرہ علاقوں میں تقریباً ساڑھے 6 لاکھ حاملہ خواتین کو خدمات تک رسائی میں مسائل کا سامنا ہے۔

ان کا کہنا تھا کہ 82 اضلاع میں حالیہ سیلاب سے 33 ملین سے زائد افراد متاثر ہوئے جبکہ4 ملین بچے صحت کی سہولیات سے محروم ہیں۔

وفاقی وزیر نے کہا کہ بی آئی ایس پی سٹنٹنگ کی روک تھام کیلئے کوشاں ہے، موسمیاتی تبدیلی سب سے زیادہ کمزور آبادی کو متاثر کرتا ہے۔

شازیہ مری نے یہ بھی کہا کہ ڈبلیو ایف پی اور بی آئی ایس پی نے صحت غذائیت کی صورتحال کی بہتری کیلئے نشو و نما پروگرام تشکیل دیا ہے۔

وفاقی وزیر شازیہ مری نے مزید کہا کہ نشوونما پروگرام کفالت پروگرام سے منسلک حاملہ اور دودھ پلانے والی ماؤں کیلئے ہے۔