گورنر پنجاب بلیغ الرحمان نے کہا ہے کہ پاکستان کو خوشحال بنانا حکومت کی اولین ترجیح ہے۔

تفصیلات کے مطابق گورنر پنجاب بلیغ الرحمٰن نے آج یہاں گورنر ہائوس لاہور میں اے این پی (پنجاب) کے سیکرٹری جنرل امیر بہادر خان ہوتی نے وفد کے ہمراہ ملاقات کی جس میں پنجاب کی سیاسی صورتحال سمیت مختلف امور پر تبادلہ خیال کیا گیا ہے۔

اس موقع پر گفتگو کرتے ہوئے گورنر پنجاب محمد بلیغ الرحمان نے کہا کہ پاکستان کو مضبوط اور خوشحال بنانا حکومت کی اولین ترجیح ہے جس کے لئے سب کو چاہئے کہ وہ اپنی ذمہ داری پوری کریں۔

 اُنہوں نے کہا کہ حکومت کا بنیادی مقصد صرف اور صرف عوام کی ترقی اور خوشحالی ہے جبکہ حکومت ملک کو درپیش بحرانوں سے نکالنے کے لئے مخلصانہ کوششیں کر رہی ہے اور ان اقدامات کے نتیجے میں معیشت سمیت اہم شعبوں میں مثبت اثرات بھی مرتب ہو رہے ہیں۔

اس موقع پر جنرل سیکرٹری اے این پی(پنجاب)امیر بہادرخاں ہوتی نے گورنر پنجاب کو پنجاب میں پختونوں کو درپیش مسائل سے آگاہ کیا۔

اُنہوں نے کہا کہ پختونوں کی بڑی تعداد پنجاب میں مستقل رہائش پزیر ہے جنہیں شناختی کارڈ، ڈومیسائل اور پاسپورٹ سمیت دیگر مسائل کا سامنا ہے۔

گورنر پنجاب بلیغ الرحمان نے پختونوں کو درپیش مسائل کو حل کرنے کے لیے اپنا کردار ادا کرنے کی یقین دہانی کروائی۔

 وفد میں جنرل سیکرٹری عوامی نیشنل پارٹی پنجاب امیر بہادر خان ہوتی، گلزیب خان اور فیصل خان سمیت دیگر بھی موجود تھے۔