حافظ نعیم الرحمٰن نے کہا ہے کہ الیکشن کمیشن اپنے اختیار کو بروئے کار لاتے ہوئے حتمی طور پر انتخابات کا اعلان کرے۔

تفصیلات کے مطابق امیرجماعت اسلامی کراچی حافظ نعیم الرحمٰن نے ادارہ نورحق میں کراچی میں بلدیاتی انتخابات کے مزید 3 ماہ التواء کے لیے صوبائی کابینہ کی منظوری کے بعد وزارت بلدیات کی جانب سے الیکشن کمیشن کو لکھے گئے خط کے خلاف ہنگامی پریس کانفرنس کرتے ہوئے کہا کہ سندھ حکومت کی جانب سے مسلسل کراچی دشمن اقدامات کیے جارہے ہیں۔

انہوں نے کہا کہ الیکشن کمیشن بار بار الیکشن کا اعلان کرتی ہے لیکن سندھ حکومت خط و کتابت کا سلسلہ شروع کر دیتی ہے۔

ان کا کہنا تھا کہ الیکشن کمیشن نے جماعت اسلامی کے مطالبہ پر 9  نومبر اسٹیک ہولڈرز پر مشتمل اجلاس طلب کیا تھا، چھٹی کے باعث اجلاس نہ ہوسکا لیکن 14 نومبر کو اجلاس میں ضرور شریک ہوں گے جبکہ سپریم کورٹ کا بھی واضح فیصلہ ہے کہ کراچی میں انتخابات کروائے جائیں ۔

 حافظ نعیم الرحمٰن نے کہا کہ پیپلز پارٹی اپنی پارٹی کو جمہوری جماعت کہنے کا دعویٰ کرتی ہے لیکن عملا کراچی دشمن اقدامات کیے جارہے ہیں، پیپلز پارٹی اور ایم کیو ایم کا گٹھ جوڑ ہے جس کی وجہ سے کراچی کا کوئی والی وارث نہیں ہے۔

انہوں نے کہا کہ کراچی پر ایک ناجائز ایڈمنسٹریٹر تعین ہے اس کے باوجود ایم کیو ایم کا کہنا کہ کراچی کا ایڈمنسٹریٹر ایم کیو ایم کا ہے۔

ان کا کہنا تھا کہ شہر کی تمام اسٹیک ہولڈرز جماعتوں پر مشتمل اجلاس طلب کیا گیا ہے، الیکشن کمیشن حتمی طور پر بلدیاتی انتخابات کا اعلان کرے اور سندھ حکومت کو پابند کرے۔

 امیرجماعت اسلامی کراچی نے کہا کہ سندھ حکومت کو کس نے اختیار دیا ہے کہ وہ کراچی کے ساڑھے تین کروڑ عوام کا فیصلہ کرے جبکہ سندھ اسمبلی میں وڈیروں کی اکثریت ہے جو کہ کراچی کے شہریوں کا استحصال کررہے ہیں۔

انہوں نے کہا کہ مصنوعی تنفس فراہم کرنے کا یہ عمل اب ختم ہونا چاہیئے اور اسٹیبلشمنٹ کو بھی چاہیئے کہ اب مردہ گھوڑے میں جان نہ ڈالے۔

ان کا کہنا تھا کہ بلدیاتی انتخابات کے انعقاد کے لیے ایک طرف جماعت اسلامی اور عوام ہیں اور دوسری جانب تمام پارٹیاں موجود ہیں، الیکشن کمیشن اپنے اختیار کو بروئے کار لاتے ہوئے حتمی طور پر انتخابات کا اعلان کرے۔

حافظ نعیم الرحمٰن نے کہا کہ سندھ حکومت نے 6 سال میں سورج لائن منصوبہ بنایا جس پر عوام سفر ہی نہیں کرتے، گرین لائن منصوبہ بنایا لیکن وہ بھی ادھورا چھوڑدیا ۔

انہوں نے کہا کہ اب پیپلز پارٹی یونیورسٹی روڈ پر ریڈ لائن منصوبہ بنانا چاہتی ہے جس پر اربوں روپے برباد کیے جارہے ہیں۔

ان کا کہنا تھا کہ مرتضیٰ وہاب کراچی کے سینکڑوں ہوڈنگ بورڈ کے پیسوں کا حساب دیں۔

امیرجماعت اسلامی کراچی حافظ نعیم الرحمٰن نے مزید کہا کہ جماعت اسلامی کی حق دو کراچی تحریک جاری ہے اور پر امن طریقے سے جدوجہد جاری رکھیں گے۔

اس موقع پر نائب امراء کراچی برجیس احمد، ڈاکٹر اسامہ رضی، راجا عارف سلطان، محمد اسحاق خان، عبد الوہاب، سکریٹری کراچی منعم ظفر خان، ڈپٹی سکریٹریز کراچی عبد الرزاق خان، عبد الرحمن فدا، یونس بارائی، سکریٹری اطلاعات زاہد عسکری ودیگر بھی موجود تھے۔