پاکستان تحریک انصاف کے آج دوبارہ سے شروع ہونے والے لانگ مارچ کیلئے پنجاب پولیس نے سیکیورٹی پلان از سر نو تشکیل دے دیا۔

ترجمان پنجاب پولیس کے مطابق وزیر آباد اور ٹوبہ ٹیک سنگھ سے شروع ہونے والے لانگ مارچ پر مجموعی طور پر 20 ہزار سیکیورٹی اہلکار تعینات کیے جائیں گے۔

ترجمان کا کہنا ہے کہ پی ٹی آئی رہنما شاہ محمود قریشی اور اسد عمر کو پنجاب پولیس کی خصوصی اسکواڈ لانگ مارچ کے ابتدائی پوائنٹس پر پہنچائیں گی۔

ترجمان نے بتایا کہ لانگ مارچ کے دونوں قافلوں کے کنٹینرز پر بلٹ پروف شیشے اور روسٹرم پہنچا دیئے گئے ہیں اور لانگ مارچ انتظامیہ کو سیکیورٹی ایس او پیز پر ہر صورت عملدر آمد کرنے کی درخواست کی گئی ہیں۔

سیکیورٹی ایس او پیز کے مطابق کنٹینر کے ارد گرد سیکیورٹی کا خصوصی حصار بنایا جائے گا، کسی بھی غیر متعلقہ شخص یا گاڑی کو کنٹینر کے قریب نہیں آنے دیا جائے گا۔

سیکیورٹی ایس او پیز میں بتایا گیا ہے کہ لانگ مارچ کے روٹس کی عمارتوں پر کمانڈوز تعینات ہونگے، لانگ مارچ کی سی سی ٹی کیمروں سے مانیٹرنگ کی جائے گی اور لانگ مارچ میں آنے والے شرکاء کے اسلحہ بردار پرائیویٹ گارڈز کا داخلہ ممنوع، ہوائی فائرنگ پر پابندی ہوگی۔

ترجمان کا کہنا ہے کہ سنٹرل پولیس آفس میں قائم کنٹرول روم سے بھی مانیٹرنگ کا عمل جاری رہے گا جبکہاسپیشل برانچ، سی ٹی ڈی اور ضلعی پولیس کو لانگ مارچ کے روٹس پر سرچ اینڈ کومبنگ آپریشنز روزانہ کی بنیادوں پر کرنے کی ہدایات جاری کردی گئی ہیں۔

ترجمان پنجاب پولیس نے مزید بتایا کہ شہریوں کے لیے ٹریفک کی روانی یقینی بنانے کے لیے متبادل روٹس اور اضافی نفری تعینات کی جائے گی۔

وزیرآباد: حقیقی آزادی مارچ کا دوبارہ آغاز آج سے ہوگا

خیال رہے کہ پاکستان تحریک انصاف کے حقیقی آزادی مارچ کا آج سے دوبارہ آغاز ہونے جارہا ہے۔

 پی ٹی آئی کا لانگ مارچ جہاں سابق وزیراعظم عمران خان پر قاتلانہ حملے کے باعث عارضی طور پر ختم کردیا تھا آج سے ایک بار پھر اسی مقام سے حقیقی آزادی کے مارچ کا آغاز کیا جائیگا۔

نیا کنٹینر تیار اور سیکیورٹی کی صورتحال:

 لانگ مارچ پر فائرنگ کے واقعہ کے بعد قائدین کیلئے نیا کنٹینر تیار کیا گیا ہے جس ہر بلٹ پروف شیشہ لگانے کے علاوہ دیگر حفاظتی اقدامات بھی کئ جارہے ہیں جبکہ لانگ مارچ کی سکیورٹی کے لئے پولیس کی بھاری نفری بھی تعینات ہو گی۔